भिगवण, (पुणे) : “तू मोठा भाई झाला का? इथला भाई मी आहे!” असे म्हणत (Bhigwan News) करत एका तरुणाने भरचौकात चारचाकी गाडीतून धारदार कोयता काढून एका 21 वर्षीय तरुणाच्या डोक्यात गंभीर वार केल्याची घटना घडली. शेटफळगढे (ता. इंदापूर) बस स्टॅन्ड परिसरात रविवारी (ता. 24) रात्री सव्वा नऊ वाजण्याच्या सुमारास हि घटना घडली असून याप्रकरणी भिगवण पोलिसांनी तीन तरुणांवर गुन्हा दाखल केला आहे.
सुदीप संदीप सवाणे (वय 21, व्यवसाय- सेंट्रींग, रा. शेटफळगढे, ता. इंदापूर) असे मारहाण झालेल्या तरुणाचे नाव आहे. तर तुषार नवनाथ सोनवणे, अमोल नामदेव मचाले, आशु उर्फ अक्षय सोनवणे (सर्व रा. शेटफळगढे, ता. इंदापुर) अशी मारहाण करणाऱ्या तिघांची नावे आहेत. याप्रकरणी सुदीप सवाणे याने भिगवण पोलीस ठाण्यात फिर्याद दिली.
पोलिसांनी दिलेल्या माहितीनुसार, फिर्यादी सुदीप सवाणे हा रविवारी रात्री सव्वा नऊ वाजण्याच्या सुमारास त्याचा मित्र सुरज सवाणे याच्यासोबत मोटारसायकलवरून बारामती-भिगवण रोडने शेटफळगढे येथे येत होता. त्याच वेळी त्यांचा मित्र दीपक बबन जाधव आणि तुषार नवनाथ सोनवणे हे दीपकच्या कार मधून जाताना दिसले. कारने ओव्हरटेक करताना सुदीप आणि दीपक यांनी रस्त्यात एकमेकांना नेहमीप्रमाणे चेष्टेने शिव्या देऊन चिडवले.
मात्र, या चेष्टा-मस्करीचा राग कारमधील तुषार सोनवणे याला आला. सुदीप गावात पोहोचल्यावर तुषारने त्याला फोन करून ‘शेटफळगढे बस स्टॅन्डवर ये’ असे सांगितले. सुदीप त्याचा मित्र प्रितम सवाणे याला सोबत घेऊन तेथे गेला आणि “मी दीपकला चेष्टेने शिव्या दिल्या, तुला काही बोललो नाही,” असे समजावून सांगू लागला. “तू मोठा भाई झाला का? इथला भाई मी आहे!” असे म्हणत थेट आपल्या कारमधून धारदार कोयता काढला आणि सुदीपच्या डोक्यात जोराने मारला. सुदीपच्या डोक्यातून रक्त वाहू लागले.
यावेळी तुषारचा चुलत भाऊ अक्षय सोनवणे यानेही तिथे येऊन सुदीपला अश्लील शिवीगाळ केली. त्याच वेळी त्यांचा दुसरा साथीदार अमोल मचाले तिथे धावून आला आणि “ही आमच्या ग्रुपची पोरं आहेत, तू आमच्या ग्रुपच्या पोरांना कशाला काय बोलला?” अशी दमदाटी करत त्यानेही गोंधळ घातला. हा वाद सुरू असताना गोपाळ वाबळे व इतर ग्रामस्थांनी मध्यस्थी करत भांडणे सोडवण्याचा प्रयत्न केला. परिसरात मोठी गर्दी जमू लागल्याचे पाहून आरोपी तुषार सोनवणे आणि दीपक जाधव हे त्यांच्या कारमधून घटनास्थळावरून सुसाट पळून गेले.
दरम्यान, या भयंकर मारहाणीनंतर जखमी सुदीपला त्याचे मित्र प्रितम आणि मंगेश सोमनाथ सवाणे यांनी हॉस्पिटलमध्ये उपचारासाठी दाखल केले. प्रथमोपचार घेतल्यानंतर सुदीपने भिगवण पोलीस ठाणे गाठून फिर्याद दिली. त्यानुसार वरील तिघांवर गुन्हा दाखल करण्यात आला आहे.
