पुणे : दाखल केलेला गुन्हा मागे घेण्यासाठी एका महिलेला कारची धडक देऊन जिवे मारण्याचा प्रयत्न केल्याची धक्कादायक घटना येरवडा परिसरात घडली आहे. याप्रकरणी येरवडा पोलिसांनी तिघांविरोधात गुन्हा दाखल केला असून पुढील तपास सुरू आहे.
या घटनेत वसुधा धनंजय गरड (वय 29, रा. महाराष्ट्र हाऊसिंग बोर्ड, येरवडा) या जखमी झाल्या आहेत. त्यांनी येरवडा पोलीस ठाण्यात तक्रार दिली आहे.
पोलिसांनी दिलेल्या माहितीनुसार, गुरुवारी (दि. 11) दुपारी सुमारे 1.30 वाजता वसुधा गरड या दुचाकीवरून शांतीरक्षक सोसायटी परिसरातून जात होत्या. त्यावेळी आरोपी त्यांचा पाठलाग करत असल्याचा आरोप करण्यात आला आहे.
शांतीरक्षक सोसायटीच्या प्रवेशद्वाराजवळ आल्यानंतर आरोपींनी कारने त्यांच्या दुचाकीला धडक दिली. या धडकेत त्या जखमी झाल्या.
तक्रारीनुसार, धडक दिल्यानंतर आरोपींनी कारमधून उतरून त्यांना धमकावले. “आमच्या विरोधात दाखल केलेला गुन्हा मागे घे. यावेळी तू बचावली आहेस, पुढच्या वेळी तुला जिवंत सोडणार नाही,” अशा स्वरूपाची धमकी देत आरोपी घटनास्थळावरून पसार झाल्याचा आरोप फिर्यादीने केला आहे.
घटनेनंतर जखमी महिलेने येरवडा पोलीस ठाण्यात धाव घेऊन तक्रार दाखल केली. त्यानुसार पोलिसांनी तिघांविरोधात गुन्हा नोंदविला आहे. या प्रकरणाचा पुढील तपास पोलीस निरीक्षक खेडकर करीत आहेत.
