न्हावरे: शेतातील कामे करण्यास सांगितल्याच्या किरकोळ कारणावरून रागाच्या भरात एका २६ वर्षीय नातवाने आपल्या ८४ वर्षीय वृद्ध आजोबांवर लोखंडी गजाने जीवघेणा हल्ला करून त्यांची निर्घृण हत्या केल्याची धक्कादायक घटना बाभुळसर बुद्रुक (ता. शिरूर) येथे सोमवारी(दि.१५)सकाळी घडली. या घटनेमुळे परिसरात एकच खळबळ उडाली असून, पोलिसांनी आरोपी नातवाला अवघ्या काही तासांत ताब्यात घेतले आहे.
दशरथ यशवंत राऊत (वय ८४, रा. बाभुळसर बुद्रुक ,ता.शिरूर, जि.पुणे) असे मृत्यू झालेल्या वृद्ध आजोबाचे नाव असून, सोमनाथ बाळासाहेब राऊत (वय २६) या नातवाला पोलिसांनी अटक केली आहे. याप्रकरणी मृत दशरथ राऊत यांचा मुलगा दुर्योधन दशरथ राऊत यांनी मांडवगण फराटा औटपोस्ट पोलीस चौकी अंतर्गत शिरूर पोलीस ठाण्यात फिर्याद दाखल केली आहे.
या घटनेबाबत शिरूर पोलिसांनी दिलेल्या माहिती अशी की, सोमवारी सकाळी आठच्या सुमारास राऊत कुटुंबाच्या राहत्या घरात ही घटना घडली. दशरथ राऊत हे नातू सोमनाथ याला शेतातील कामांबाबत सूचना देत होते. मात्र,या गोष्टीचा राग मनात धरून सोमनाथने संतापाच्या भरात लोखंडी गज उचलून आजोबांच्या डोक्यावर व पाठीवर जोरदार प्रहार केले. अचानक झालेल्या या हल्ल्यात दशरथ राऊत गंभीर जखमी झाले. डोक्यावर व शरीरावर गंभीर मार लागल्याने त्यांचा जागीच मृत्यू झाला. घटनेनंतर परिसरात भीती आणि हळहळ व्यक्त करण्यात येत आहे.
घटनेची माहिती मिळताच शिरूर पोलीस स्टेशनचे प्रभारी पोलीस निरीक्षक विनोद पाटील यांच्या मार्गदर्शनाखाली पोलिस पथकाने घटनास्थळी धाव घेतली. पोलिसांनी तातडीने तपासाची सूत्रे हाती घेत आरोपीचा शोध सुरू केला. गुन्हा घडल्यानंतर अवघ्या काही वेळातच आरोपी सोमनाथ राऊत याला ताब्यात घेण्यात पोलिसांना यश आले. आरोपीविरुद्ध खुनाचा गुन्हा दाखल करण्यात आला असून,पुढील तपास पोलीस निरीक्षक विनोद पाटील यांच्या मार्गदर्शनाखाली पोलिस उपनिरीक्षक दिलीप पवार करीत आहेत.
गावातील शांत वातावरणाला हादरा देणाऱ्या या घटनेमुळे बाभुळसर बुद्रुक परिसरात शोककळा पसरली असून, नातवाकडूनच आजोबांची हत्या झाल्याने सर्वत्र हळहळ व्यक्त केली जात आहे.
