पुणे: पुण्यातील वानवडी परिसरात एका ठेकेदाराच्या बंगल्यावर पहाटेच्या सुमारास धाडसी दरोडा टाकून चोरट्यांनी तब्बल २७ लाख १५ हजार रुपयांचा ऐवज लुटल्याची घटना समोर आली आहे. या प्रकरणामुळे परिसरात एकच खळबळ उडाली असून, वानवडी पोलिसांनी अज्ञात तीन चोरट्यांविरुद्ध गुन्हा दाखल करून तपास सुरू केला आहे.
या प्रकरणी ६५ वर्षीय ठेकेदाराने वानवडी पोलिसांकडे फिर्याद दिली आहे. पोलिसांनी दिलेल्या माहितीनुसार, ठेकेदाराचा परमार पार्क परिसरात बंगला आहे. मंगळवारी, २१ जुलै रोजी पहाटे सुमारे तीनच्या सुमारास तीन चोरटे बंगल्याच्या पाठीमागील बाजूने आले. त्यांनी मागील दरवाजावरील लोखंडी जाळी कापून बंगल्यात प्रवेश केला. त्यावेळी घरातील सर्वजण गाढ झोपेत होते.
बंगल्यात प्रवेश केल्यानंतर चोरट्यांनी ठेकेदार आणि त्यांच्या कुटुंबीयांना शस्त्राचा धाक दाखवत धमकावले. त्यानंतर त्यांनी घरातील शयनगृहातील कपाट उघडून हिरेजडीत सोन्याचे दागिने आणि १३ लाख १५ हजार रुपयांची रोकड लंपास केली. एवढ्यावरच न थांबता त्यांनी ठेकेदाराची पत्नी आणि सासू यांच्या गळ्यातील सोन्याचे दागिनेही हिसकावून घेतले. संपूर्ण घटना काही मिनिटांत घडवून चोरटे तेथून पसार झाले.
घटनेनंतर ठेकेदाराने तातडीने पोलिसांशी संपर्क साधत घडलेला प्रकार कळविला. माहिती मिळताच वरिष्ठ पोलीस अधिकारी घटनास्थळी दाखल झाले आणि त्यांनी पाहणी केली. पोलिसांनी बंगल्याच्या परिसरातील सीसीटीव्ही फुटेज ताब्यात घेऊन त्याची तपासणी सुरू केली आहे. चोरट्यांचा माग काढण्यासाठी विविध पथके रवाना करण्यात आली असून, तांत्रिक पुरावे आणि सीसीटीव्हीच्या आधारे आरोपींचा शोध सुरू आहे. या धाडसी दरोड्यामुळे वानवडी परिसरातील नागरिकांमध्ये भीतीचे वातावरण निर्माण झाले आहे.
