पुणे, ता. 24 : गणेश विसर्जन मिरवणुकीच्या पार्श्वभूमीवर पुणे पोलिसांनी शहरात कडेकोट सुरक्षा व्यवस्था उभारली आहे. शुक्रवारी (ता. 25) होणाऱ्या विसर्जन मिरवणुकीसाठी तब्बल 10 हजार पोलिसांचा बंदोबस्त तैनात करण्यात येणार असून, मिरवणुकीच्या मार्गावर 2 हजार सीसीटीव्ही कॅमेऱ्यांची नजर राहणार आहे. विशेष म्हणजे, एआय तंत्रज्ञानावर आधारित सीसीटीव्हीच्या माध्यमातूनही महत्त्वाच्या घडामोडींवर लक्ष ठेवण्यात येणार आहे. अशी माहिती पोलिस आयुक्त अमितेशकुमार यांनी बुधवारी पत्रकार परिषदेत दिली.
महात्मा फुले मंडईतील लोकमान्य टिळक यांच्या पुतळ्याजवळून विसर्जन मिरवणुकीला सुरुवात होणार आहे. लक्ष्मी रस्ता, टिळक रस्ता, केळकर रस्ता आणि कुमठेकर रस्ता यांसह प्रमुख मार्गांवर मोठा पोलिस बंदोबस्त तैनात करण्यात येणार आहे. नियंत्रण कक्षातून मिरवणुकीच्या संपूर्ण हालचालींवर लक्ष ठेवले जाणार आहे.
बेलबाग चौक, अलका चित्रपटगृहाजवळील लोकमान्य टिळक चौक, खंडोजीबाबा चौक, देशभक्त केशवराव जेधे चौक आणि स. प. महाविद्यालय चौक येथे पोलिस मदत केंद्रे सुरू करण्यात येणार आहेत. चोरी, छेडछाड तसेच अन्य अनुचित प्रकारांना आळा घालण्यासाठी साध्या वेशातील पोलिस, होमगार्ड आणि एसआरपीएफची पथकेही तैनात राहणार आहेत.
ध्वनिमर्यादा ओलांडली तर थेट गुन्हा
विसर्जन मिरवणुकीदरम्यान उच्च क्षमतेच्या ध्वनिक्षेपकांचा वापर करून ध्वनिमर्यादेचे उल्लंघन करणाऱ्या मंडळांवर कारवाई करण्यात येणार आहे. ध्वनिप्रदूषण रोखण्यासाठी विशेष यंत्रणा कार्यरत ठेवण्यात येणार असून, मंडळांनी नियमांचे काटेकोर पालन करावे, असे पोलिसांनी आवाहन केले आहे.
आपत्कालीन वाहनांसाठी स्वतंत्र मार्ग
मिरवणुकीमुळे वाहतूक कोंडी होऊ नये, यासाठी विशेष वाहतूक नियोजन करण्यात आले आहे. रुग्णवाहिका, अग्निशामक दलाचे बंब आणि पोलिसांची वाहने आपत्कालीन परिस्थितीत तातडीने घटनास्थळी पोहोचू शकतील, यासाठी स्वतंत्र मार्गाची व्यवस्था करण्यात येणार आहे.
लेझर लाइटला मनाई
मिरवणुकीत लेझर लाइटचा वापर करू नये, असे आवाहन सहपोलिस आयुक्त संजय दराडे यांनी केले आहे. लेझरमुळे नागरिक तसेच वाहनचालकांच्या सुरक्षिततेचा प्रश्न निर्माण होऊ शकतो. त्यामुळे संबंधित नियमांचे आणि न्यायालयीन आदेशांचे पालन करण्याचे आवाहन पोलिसांनी केले आहे.
दरम्यान, गणेशोत्सवाच्या पार्श्वभूमीवर शहरातील सराईत गुन्हेगारांवर प्रतिबंधात्मक कारवाई करण्यात आली आहे. गर्दीच्या ठिकाणी साध्या वेशातील पोलिसांची पथके तैनात करण्यात आली असून, संशयास्पद हालचालींवर बारकाईने लक्ष ठेवले जाणार आहे.
“विसर्जन सोहळा शांततेत आणि सुरळीत पार पडण्यासाठी बंदोबस्ताचे नियोजन करण्यात आले आहे. नागरिक, गणेश मंडळांचे कार्यकर्ते आणि स्वयंसेवकांनी पोलिसांना सहकार्य करून सर्व नियमांचे पालन करावे.”
अमितेशकुमार, पोलिस आयुक्त, पुणे शहर
