पुणे : गेल्या काही दिवसांपासून अन्न व औषध प्रशासनाचे आयुक्त तुकाराम मुंढे यांच्या मार्गदर्शनाखाली भेसळखोरांविरोधात विशेष तपासणी मोहीम तीव्र करण्यात आली आहे.सिन्नर तालुक्यातील पुतळेवाडी येथे जुलै महिन्यात टाकलेल्या छापा सत्रात 17 लाख रुपयांचा संशयास्पद दूध पावडरचा साठा हस्तगत करण्यात आला होता.आता यां प्रकरणात दोन बड्या अधिकाऱ्यांवर शिस्तभंगाची कारवाई करण्यात आल्याची माहिती समोर आली आहे.
आधीपासून या प्रकरणात आरोपी हेमंत पवार याच्यावर आधीपासूनच दूध भेसळीचे गुन्हे दाखल असतानाही, एफडीएच्या अधिकाऱ्यांनी ठोस पावले उचलणे टाळले होते. तक्रारदार भाऊसाहेब बैरागी यांनी या प्रकरणाचा वरिष्ठ पातळीवर सातत्याने पाठपुरावा केला.या घटनेची गंभीर दखल घेत एफडीएचे सहाय्यक आयुक्त एम. यू. माने यांनी सखोल चौकशी केली. या चौकशी अहवालातून सहाय्यक आयुक्त दिनेश तांबोळी आणि अन्नसुरक्षा अधिकारी संदीप तोरणे यांनी आपल्या कायदेशीर कर्तव्यात जाणीवपूर्वक निष्काळजीपणा दाखवल्याचे निष्पन्न झाले आहे.
दोन्ही जबाबदार अधिकाऱ्यांनी आपल्या कर्तव्यात हेतूपुरस्सर कसूर केल्याचे स्पष्ट झाल्यानंतर त्यांच्यावर कडक शिस्तभंगाची कारवाई करण्याची शिफारस करण्यात आली आहे. नाशिक विभागाने हा चौकशी अहवाल आयुक्त तुकाराम मुंढे यांच्याकडे सुपूर्द केला असून, आता हे दोन्ही अधिकारी दोषी आढळल्यास त्यांच्यावर तुकाराम मुंढे काय अंतिम निर्णय घेतात, याकडे सर्वांचे लक्ष लागले आहे.
दरम्यान नाशिक विभागातील चार जिल्ह्यांमध्ये गेल्या 10 दिवसांत सुमारे 36 कारवाया करून 5 कोटी 40 लाख 16 हजार 621 रुपयांचा संशयास्पद साठा जप्त करण्यात आला आहे. मात्र, याच मोहिमेदरम्यान दोन अधिकाऱ्यांच्या संशयास्पद भूमिकेमुळे प्रशासनात खळबळ उडाली आहे.
