लोणी काळभोर : गणपती विसर्जन मिरवणुकीत नियमांचे उल्लंघन करून कर्णकर्कश डीजेचा दणदणाट आणि लेजर लाईटचा मारा केल्याचा प्रकार लोणी काळभोरमधील छत्रपती संभाजीनगर परिसरात समोर आला आहे. दोन गणेश मंडळांमध्ये ‘आपलाच आवाज मोठा’ अशी जणू स्पर्धाच रंगली होती. डीजेच्या तालावर तरुणांचा धांगडधिंगा, ट्रॅक्टरवर चढून सुरू असलेला जल्लोष आणि एकाच ठिकाणी अर्ध्या तासाहून अधिक काळ थांबलेली मिरवणूक यामुळे परिसरातील वातावरण तणावपूर्ण बनले होते.
गुरुवारी (ता. 24) विसर्जन मिरवणुकीदरम्यान दोन मंडळे एकाच ठिकाणी आल्यानंतर दोन्ही बाजूंनी मोठ्या आवाजात डीजे वाजविण्यास सुरुवात केली. त्यात लेजर लाईटचाही वापर करण्यात आला. एकमेकांपेक्षा आपलाच डीजे मोठा असल्याचे दाखविण्याच्या नादात दोन्ही मंडळे बराच वेळ एकाच ठिकाणी थांबून राहिली. त्यामुळे मिरवणुकीचा मार्गही काही काळ ठप्प झाला.
याचदरम्यान काही तरुण ट्रॅक्टरवर चढून नाचत असल्याचे दृश्य दिसून आले. मोठ्या आवाजातील डीजे, लेजर लाईट आणि तरुणांचा धांगडधिंगा यामुळे परिसरात मोठ्या प्रमाणात गर्दी झाली. परिस्थिती नियंत्रणाबाहेर जाण्याची शक्यता निर्माण झाल्यानंतर रात्री सुमारे अकरा वाजण्याच्या सुमारास लोणी काळभोर पोलिस घटनास्थळी दाखल झाले. पोलिसांनी मंडळांच्या कार्यकर्त्यांना निर्देश दिल्यानंतर वातावरण काहीसे शांत झाले आणि विसर्जन मिरवणूक पुढे मार्गस्थ झाली. मात्र, या संपूर्ण प्रकारावर पोलिसांकडून नेमकी कोणती कारवाई करण्यात आली? असा प्रश्न आता उपस्थित होत आहे.
लोणी काळभोरमध्ये मात्र कारवाई कुठे?
गणेशोत्सवाच्या विसर्जन मिरवणुकीत नियमांचे उल्लंघन करून कर्णकर्कश डीजे वाजविणाऱ्या मंडळांवर पुणे शहर आणि पिंपरी-चिंचवड पोलिसांनी गुन्हे दाखल करून डीजे साहित्य जप्त केले आहे. पुणे शहरातील मोहम्मदवाडी आणि काळेपडळ परिसरात तर पोलिसांनी डीजे साहित्य आणि टाटा 709 ट्रक असा सुमारे 14 लाख रुपयांचा मुद्देमाल जप्त केल्याची माहिती समोर आली आहे. बारामती पोलिसांनीही सार्वजनिक मिरवणुका आणि उत्सवांमध्ये कर्णकर्कश डीजेचा वापर करणाऱ्यांविरोधात कारवाई केली आहे.
परवानगी असली तरी आवाजाची मर्यादा पाळणे बंधनकारक
डीजे किंवा ध्वनिक्षेपक वापरण्यासाठी स्थानिक पोलिसांची परवानगी आवश्यक असते. परवानगी देताना वेळेची मर्यादा आणि ध्वनीप्रदूषणासंदर्भातील नियमही लागू असतात. मात्र, परवानगी मिळाल्यानंतर प्रत्यक्ष मिरवणुकीत आवाजाची मर्यादा पाळली जाते का, हा प्रश्न अनेकदा उपस्थित होतो. नियमांचे उल्लंघन झाल्यास पोलिसांकडे घटनास्थळी कारवाई करण्याचे अधिकार आहेत. ध्वनीची पातळी तपासण्यासाठी डेसीबल मीटरचा वापर, पंचनामा आणि आवश्यक पुरावे संकलित करून पुढील कायदेशीर प्रक्रिया केली जाऊ शकते.
आयुक्तांच्या आदेशांची अंमलबजावणी कधी?
एकीकडे पुणे शहर पोलिसांकडून डीजे आणि ध्वनीप्रदूषणाविरोधात कारवाईचा धडाका सुरू असल्याचे चित्र आहे. दुसरीकडे, लोणी काळभोरमधील विसर्जन मिरवणुकीत नियमांचे उल्लंघन झाल्याचा आरोप असताना संबंधित मंडळांवर अद्याप ठोस कारवाई झाल्याचे स्पष्ट झालेले नाही. मिरवणुकीदरम्यान पोलिस घटनास्थळी पोहोचले, कार्यकर्त्यांना सूचना दिल्या आणि त्यानंतर मिरवणूक मार्गस्थ झाली. मात्र, नियम धाब्यावर बसवून डीजेचा दणदणाट करणाऱ्या मंडळांवर गुन्हा दाखल होणार का? डीजे साहित्य जप्त केले जाणार का? की केवळ सूचना देऊन प्रकरण संपवले जाणार? असे प्रश्न आता नागरिकांकडून उपस्थित होत आहेत.
दरम्यान, पुणे शहर पोलीस आयुक्त अमितेश कुमार यांनी ध्वनीप्रदूषण आणि नियमभंगाबाबत कठोर भूमिका घेतलेली असताना लोणी काळभोरमध्ये त्याची अंमलबजावणी कितपत होते, याकडे नागरिकांचे लक्ष लागले आहे. त्यामुळे विसर्जन मिरवणुकीतील या प्रकाराची पोलिस प्रशासन दखल घेऊन संबंधितांवर काय कारवाई करणार, याकडे संपूर्ण जिल्ह्याचे लक्ष लागले आहे.
