मुंबई : महिलांबद्दल वादग्रस्त विधान केल्याप्रकरणी अडचणीत आलेले बुलढाण्याचे शिवसेना आमदार संजय गायकवाड यांना मुंबई उच्च न्यायालयाच्या नागपूर खंडपीठाने मोठा दिलासा दिला आहे. या प्रकरणातील पुढील सुनावणीपर्यंत गायकवाड यांच्याविरोधात पोलिसांना चार्जशीट (दोषारोपपत्र) प्रविष्ट करण्यास न्यायालयाने स्थगिती दिली आहे. तसेच राज्य सरकारला याप्रकरणी 21 ऑक्टोबर पर्यंत आपली भूमिका स्पष्ट करण्याचे निर्देश देण्यात आले आहेत.
नेमकं काय आहे प्रकरण?
चिखलीच्या भाजप आमदार श्वेता महाले यांनी ‘बाप तो बाप रहेगा’ या गाण्यावर नृत्य केले होते. यावर भाष्य करताना संजय गायकवाड यांनी महिलांच्या शारीरिक क्षमतेबाबत अयोग्य टिप्पणी केली होती. या वक्तव्यानंतर सामाजिक कार्यकर्त्या सविता बेंडवाल यांनी 12 सप्टेंबर रोजी बुलढाणा पोलिसांत तक्रार दाखल केली. या तक्रारीवरून पोलिसांनी गायकवाड यांच्यावर विनयभंगाचा गुन्हा नोंदवला होता.
गुन्हा रद्द करण्यासाठी गायकवाड यांनी नागपूर खंडपीठात याचिका दाखल केली. कोर्टात त्यांच्या वकिलांनी स्पष्ट केले की, ही तक्रार मूळ घटनेच्या 6 दिवसांनंतर दाखल करण्यात आली असून त्यामागे राजकीय हेतू आहे. तक्रारदार महिलेचा या घटनेशी थेट संबंध नसून केवळ राजकीय दबावापोटी ही कारवाई करण्यात आली असल्याचा दावाही करण्यात आला. न्यायालयीन बाबींचा विचार करून उच्च न्यायालयाने गायकवाड यांच्यावरील पुढील पोलीस कारवाईला तात्पुरती बंदी घातली आहे.
आपल्या आक्रमक वक्तव्यांमुळे आणि वादांमुळे आमदार गायकवाड नेहमीच चर्चेत राहतात. मंत्रालयातील उपहारगृहातील कर्मचाऱ्यांना झालेली मारहाण असो किंवा पुस्तकाच्या लेखकासोबत झालेला वाद असो, त्यांचे नाव सातत्याने समोर आले आहे. सध्या बुलढाणा जिल्ह्यात भाजप आमदार श्वेता महाले आणि संजय गायकवाड यांच्यात मोठा राजकीय संघर्ष पेटला असून दोन्ही बाजूंचे कार्यकर्ते आमनेसामने आले आहेत.
