उरुळी कांचन, (पुणे): मध्यरात्री घराचा दरवाजा उघडा असल्याचा फायदा घेत अज्ञात चोरट्याने घरात प्रवेश करून दोन महिलांच्या गळ्यातील सोन्याचे दागिने चोरल्याची घटना घडली. चोरीच्या वेळी महिला जागी झाल्याने आरडाओरड होताच चोरटा पसार झाला. याच परिसरातून दुचाकी आणि सीसीटीव्ही कॅमेराही चोरीला गेल्याचे समोर आले आहे. शिरसवडी (ता. हवेली) येथे शनिवारी पहाटे ही घटना घडली.
याबाबत दत्तात्रय लक्ष्मण दगडे, वय 27 वर्षे, धंदा शेती, रा.मु.पो. शिरसवडी, गोते मळा ता. हवेली) यांनी लोणीकंद पोलीस ठाण्यात फिर्याद दिली आहे. त्यानुसार अज्ञात चोरट्याच्या विरोधात गुन्हा दाखल करण्यात आला आहे.
पोलिसांनी दिलेल्या माहितीनुसार, शिरसवडी येथील दत्तात्रय दगडे यांचे वडील शनिवारी पहाटे घराचा दरवाजा उघडून बाथरुमसाठी घराचे बाहेर असलेले शौचालयात गेले होते. त्यावेळी घराचा दरवाजा उघडा असल्याचे पाहून अज्ञात चोरट्याने घरात प्रवेश केला. चोरट्याने दत्तात्रय दगडे यांच्या आईच्या गळ्यातील सुमारे 8 ग्रॅम वजनाचे सोन्याचे मंगळसूत्र आणि बहिणीच्या गळ्यातील सुमारे 8 ग्रॅम वजनाचे सोन्याचे डोरले कापून घेतले.
मात्र, चोरी करत असताना महिला जागी झाल्याने तिने आरडाओरड केली. त्यामुळे चोरट्याने तेथून पळ काढला. कुटुंबीय व शेजाऱ्यांनी त्याचा शोध घेतला; मात्र तो सापडला नाही. गावातील अनिल गणपत खेडेकर यांची MH-12-BZ-0568 क्रमांकाची सीडी डॉन दुचाकी तसेच सुभाष साहेबराव गोते यांच्या घरासमोरील सीसीटीव्ही कॅमेरा चोरीला गेल्याचेही निदर्शनास आले.
दरम्यान, या सर्व चोरीच्या घटनांमध्ये सुमारे 74 हजार रुपयांचा मुद्देमाल लंपास झाल्याची तक्रार लोणीकंद पोलिस ठाण्यात दाखल करण्यात आली आहे. अज्ञात चोरट्याविरुद्ध गुन्हा दाखल करून पोलिसांकडून तपास सुरू आहे.
