बारामती, ता. 24 : बनावट मृत्युपत्र, वैद्यकीय तंदुरुस्ती प्रमाणपत्र आणि इतर कागदपत्रांच्या आधारे जमीन व मालमत्ता स्वतःच्या नावावर करून घेतल्याच्या आरोपावरून बारामती शहर पोलिस ठाण्यात पाच जणांविरुद्ध गुन्हा दाखल करण्यात आला आहे.
प्रवीण त्रिंबकराव जाधव, विजय राजाराम जगताप, मनोज विक्रम आटोळे, श्रीकृष्ण ज्ञानदेव बोरकर आणि विकास ज्ञानदेव बोरकर अशी गुन्हा दाखल झालेल्यांची नावे आहेत. याप्रकरणी नीलेश सुभाष शितोळे यांनी फिर्याद दिली आहे.
फिर्यादीनुसार, निरावागज येथील मनीषा जनार्दन जाधव यांच्या जमिनीच्या फेरफार नोंदीत त्यांच्या मृत्यूनंतर प्रवीण जाधव यांचे नाव आल्याचे निदर्शनास आले. चौकशीदरम्यान मृत्युपत्राच्या तारखेबाबतही विसंगती आढळल्याचा दावा फिर्यादीने केला आहे.
मनीषा जाधव उपचारासाठी रुग्णालयात दाखल असताना त्यांना वैद्यकीयदृष्ट्या तंदुरुस्त असल्याचे प्रमाणपत्र देण्यात आल्याचा, तसेच मृत्युपत्रावर त्यांचा अंगठा व सही असल्याचे दाखवण्यात आल्याचा आरोप फिर्यादीत करण्यात आला आहे. या मृत्युपत्राच्या आधारे प्रतिज्ञापत्र करून फेरफार नोंद करण्यात आल्याचेही नमूद आहे.
दरम्यान, मृत्युपत्रावरील साक्षीदारांच्या सह्या, नोटरी नोंद आणि इतर कागदपत्रांचा आधार घेत जमीन व मालमत्तेवर हक्क मिळवण्याचा प्रयत्न झाल्याचा आरोप आहे. याप्रकरणी बारामती शहर पोलिसांकडून पुढील तपास सुरू आहे.
