पुणे: राज्यभर सुरू असलेल्या विशेष तपासणी मोहिमेत अन्न व औषध प्रशासनाने (एफडीए) पुणे विभागातील हॉटेल, रेस्टॉरंट, कॅन्टीन आणि डेअरी आस्थापनांवर मोठी कारवाई करत १२ अन्न व्यवसाय परवाने निलंबित केले आहेत. तपासणीत स्वयंपाकगृहातील अस्वच्छता, अन्न साठवणुकीतील त्रुटी आणि अन्न सुरक्षा नियमांचे उल्लंघन आढळून आल्याने ही कारवाई करण्यात आली. या कारवाईमध्ये पुण्यातील बालेवाडी येथील दोन आस्थापनांचाही समावेश आहे.
१६ ते २० जुलैदरम्यान पुणे विभागात राबविण्यात आलेल्या तपासणी मोहिमेत स्टार केटरिंग सर्व्हिस (मंगळवार पेठ), अशोक बार अँड रेस्टॉरंट (सोमवार पेठ), गोल्डन मॅजेस्टिक बेकरी (येवलेवाडी), गोल्डन बेकरी (कोंढवा), सिद्धार्थ ॲग्रो डेअरी (आंबेगाव), बिकांगे बियाणी एलएलपी (बाणेर), जोकर हॉस्पिटॅलिटी (बालेवाडी) आणि रेड अँड ह्यूज (कल्याणीनगर) या पुण्यातील आस्थापनांवर कारवाई करण्यात आली.
याशिवाय सातारा जिल्ह्यातील महाबळेश्वर येथील सह्याद्री रेस्टॉरंट अँड ढाबा आणि सिगडी रेस्टॉरंट, सांगलीतील हल्दी भवन कॅन्टीन तसेच कोल्हापूरमधील VBGYOR शाळा कॅन्टीन यांचेही अन्न व्यवसाय परवाने निलंबित करण्यात आले आहेत.
तपासणीदरम्यान बहुतांश ठिकाणी अन्न सुरक्षा व मानके (परवाना व नोंदणी) नियमावली, २०११ मधील अनुसूची-४ अंतर्गत स्वच्छता आणि आरोग्यविषयक निकषांचे उल्लंघन झाल्याचे निदर्शनास आले. विशेषतः स्वयंपाकगृहातील अस्वच्छता, अन्न साठवणुकीतील त्रुटी, स्वच्छतेच्या नियमांचे पालन न करणे आणि अन्न हाताळणीतील निष्काळजीपणा आढळल्याने संबंधित आस्थापनांवर कारवाई करण्यात आली आहे.
