मुंबई : मुंबई महापौर कार्यालयाला एका संशयित ई-मेलद्वारे शहरात बॉम्बस्फोट घडवण्याची धमकी मिळाली आहे. या प्रकारामुळे सुरक्षा यंत्रणा आणि मुंबई पोलीस प्रशासनामध्ये मोठी खळबळ उडाली असून शहरभरात उच्च सतर्कतेचा इशारा देण्यात आला आहे.
मिळालेल्या माहितीनुसार, या धमकीच्या ई-मेलमध्ये दोन वेगवेगळ्या तारखांना हल्ले करण्याचा कट आखल्याचे नमूद केले आहे. 31 ऑक्टोबर रोजी एका प्रसिद्ध शाळेवर ग्रेनेड फेकून हल्ला केला जाईल, असे ई-मेलमध्ये म्हटले आहे. तर 27 नोव्हेंबर रोजी महालक्ष्मी रेसकोर्स परिसरात शक्तिशाली बॉम्बस्फोट घडवून आणण्याची धमकी देण्यात आली आहे.
विशेष म्हणजे, या ई-मेलमध्ये खलिस्तान समर्थकांसह काही इतर संघटनांच्या नावांचा थेट उल्लेख करण्यात आला आहे. यामुळे हा प्रकार अत्यंत गंभीर मानला जात असून दहशतवादविरोधी पथक (ATS) आणि मुंबई पोलीस सायबर सेल या प्रकरणाचा वेगाने तपास करत आहेत.
सध्या सुरक्षा यंत्रणा ई-मेल कुठून आणि कोणत्या आयपी अ‍ॅड्रेसवरून पाठवण्यात आला आहे, याचा शोध घेत आहेत. यासोबतच ई-मेल पाठवणाऱ्या व्यक्तीची खरी ओळख पटवणे आणि या धमकीमागील मुख्य उद्देश काय आहे, याचा सखोल तपास सुरू आहे.
धमकीचे गांभीर्य लक्षात घेऊन महालक्ष्मी रेसकोर्स, प्रमुख शाळा आणि इतर महत्त्वाच्या सार्वजनिक ठिकाणी पोलीस बंदोबस्त वाढवण्यात आला आहे. नागरिकांनी कोणत्याही अफवांवर विश्वास ठेवू नये आणि परिसरात कोणतीही संशयास्पद वस्तू किंवा व्यक्ती आढळल्यास त्वरित पोलिसांशी संपर्क साधावा, असे आवाहन प्रशासनाकडून करण्यात आले आहे.
