मुंबई : एसटी बसस्थानकांवरील प्रसाधनगृहांची स्वच्छता राखण्यात हलगर्जीपणा झाल्यास संबंधित विभाग नियंत्रकांना जबाबदार धरले जाईल, असा स्पष्ट इशारा परिवहन मंत्री आणि महाराष्ट्र राज्य मार्ग परिवहन महामंडळाचे अध्यक्ष प्रताप सरनाईक यांनी दिला आहे. प्रवाशांना स्वच्छ आणि आरोग्यदायी सुविधा मिळणे आवश्यक असून, स्वच्छतेच्या बाबतीत कोणतीही तडजोड केली जाणार नसल्याचे त्यांनी सांगितले.
एसटी महामंडळाच्या मुख्यालयात नुकतीच स्वच्छतेबाबत आढावा बैठक झाली. या बैठकीत महामंडळाचे विभागप्रमुख, प्रादेशिक व्यवस्थापक आणि विभाग नियंत्रक उपस्थित होते. बसस्थानकांवरील स्वच्छतेची परिस्थिती सुधारण्यासाठी अधिकाऱ्यांनी नियमित लक्ष द्यावे, असे निर्देश सरनाईक यांनी दिले.
एसटी प्रवाशांकडून स्वच्छतेसाठी 2 रुपये अधिभार आकारला जातो. ही रक्कम दिल्यानंतर प्रवाशांना किमान स्वच्छ आणि वापरण्यायोग्य प्रसाधनगृहे मिळणे अपेक्षित आहे. मात्र, काही ठिकाणी अस्वच्छता आढळल्यास त्याचा परिणाम प्रवाशांच्या आरोग्यावर आणि एसटी महामंडळाच्या प्रतिमेवर होऊ शकतो. त्यामुळे या सुविधांकडे दुर्लक्ष करू नये, असे सरनाईक यांनी स्पष्ट केले.
प्रसाधनगृहांची नियमित तपासणी करणे, स्वच्छतेचा दर्जा कायम ठेवणे आणि कंत्राटदारांकडून करारानुसार काम करून घेणे आवश्यक आहे. केवळ कंत्राटदारांवर जबाबदारी टाकून चालणार नाही, तर संबंधित अधिकाऱ्यांनीही आपल्या कार्यक्षेत्रातील स्वच्छतेवर स्वतः देखरेख ठेवावी, असे त्यांनी सांगितले. स्वच्छतेत निष्काळजीपणा केल्यास कारवाईची जबाबदारी निश्चित केली जाईल, असा इशाराही परिवहन मंत्र्यांनी दिला.
एसटी बससेवा ही राज्यातील लाखो नागरिकांच्या दैनंदिन प्रवासाचा महत्त्वाचा भाग आहे. त्यामुळे प्रवाशांना सुखकर प्रवासासोबत स्वच्छ बसस्थानके आणि आरोग्यदायी सुविधा उपलब्ध करून देण्यावर महामंडळाने भर द्यावा, अशी भूमिका या बैठकीत मांडण्यात आली.
