शिरूर : राज्यात विधानसभा निवडणुकांची रणधुमाळी सुरु असून उमेदवारी अर्ज भरण्याची रेलचेल सुरु आहे.अशातच आता शिरुर विधानसभा निवडणुक अतिशय रंगतदार वळणावर येऊन पोहचली आहे. महायुतीकडून शिरुर येथील उमेदवारी राष्ट्रवादी अजित पवार गटाने जाहीर करताच अनेकांनी तीव्र नाराजी व्यक्त केली. आता तर ‘अभी नहीं तो कभी नही’ असे म्हणत बंडखोरी करण्यात आली आहे.
वाधोलीचे मा. उपसरपंच शांताराम कटके यांनी मंगळवारी (ता. २८) वसुबारसच्या दिवशी शक्तिप्रदर्शन करीत शिरूर तहसिल कार्यालयात अपक्ष उमेदवारी अर्ज दाखल केला आहे. यामुळे आता अजित पवार यांच्या अडचणीत वाढ झाली आहे. वाघोली ते शिरुरपर्यंत शांताराम कटके यांच्या समर्थक कार्यकर्त्यासह भव्य रॅली काढून उमेदवारी अर्ज भरण्यात आला आहे. यावेळी राष्ट्रवादीचे अनेक पदाधिकारी, कार्यकर्ते व त्यांचे समर्थक मोठ्या संख्येने उपस्थित होते.
