यवत, (पुणे) : मावस बहिणीच्या लग्नासाठी आलेल्या तरुणाला भरधाव अज्ञात टेम्पोने दिलेल्या धडकेत तरुणाचा उपचारादरम्यान मृत्यू झाल्याची घटना उघडकीस आली आहे. ही घटना यवत (ता. दौंड) येथे 10 मे 2026 सायंकाळी सव्वा सात वाजण्याच्या सुमारास ‘बिकानेर स्वीट्स’ समोर घडली.
विजय गंगाधर बाबर (वय-29, रा. धर्मगाव रस्ता, मार्केटयार्ड, ता. मंगळवेढा, जि. सोलापूर) असे अपघातात मृत्यू झालेल्या तरुणाचे नाव आहे. याबाबत त्याचे बंधू विजय गंगाधर बाबर हे भावाच्या मृत्यूच्या धक्क्यामुळे आणि मूळ गावी मंगळवेढ्यात अंत्यविधी व इतर कडक धार्मिक विधी पार पाडण्यात व्यस्त असल्याने बाबर हे तात्काळ पोलिसांत येऊ शकले नाहीत. मनस्थिती सावरल्यानंतर यवत पोलीस ठाण्यात तक्रार दिली आहे.
पोलिसांनी दिलेल्या माहितीनुसार, फिर्यादी संजय बाबर, त्यांचा मोठा भाऊ विजय बाबर आणि आई सयाबाई बाबर हे सर्वजण रविवारी 10 मे ला आपल्या मावस बहिणीच्यालग्नासाठी मंगळवेढ्याहून यवत येथे आले होते. सायंकाळी सव्वा सात वाजण्याच्या सुमारास, विजय बाबर हा यवत गावातील ‘बिकानेर स्वीट्स’ समोर पुणे-सोलापूर हायवेच्या कडेला उभा होता. हायवेच्या पलीकडे असलेल्या ‘साईकृपा टी हाऊस’मध्ये चहा पिण्यासाठी जाण्याकरिता तो रस्ता ओलांडण्याच्या तयारीत होता आणि वाहनांची पाहणी करत होता.
त्याच वेळी पुणे बाजूकडून सोलापूरच्या दिशेने एक विटकरी रंगाचा टेम्पो (एम.एच. १३/सी.यू/९०८७) भरधाव वेगात आला. या टेम्पोने रस्त्याच्या कडेला उभ्या असलेल्या विजय बाबर याला जोरदार धडक दिली. धडक इतकी जबर होती की विजय बाबर थेट डांबरी रस्त्यावर फेकला गेला आणि त्याच्या डोक्याला, तोंडाला, हाता-पायाला गंभीर दुखापत झाल्याने तो जागेवरच बेशुद्ध पडला.
जमलेल्या नागरिकांनी तात्काळ ॲम्ब्युलन्स बोलावून विजयला यवत सरकारी दवाखान्यात दाखल केले. तिथे प्राथमिक उपचार करून त्याला पुढील कडक उपचारासाठी पुण्याच्या ससून हॉस्पिटलमध्ये हलवण्यात आले. ससूनच्या आयसीयू वार्डात उपचार सुरू असतानाच, दुसऱ्या दिवशी 11 मे ला रोजी सकाळी सहा वाजता विजय बाबर याचा दुर्दैवी मृत्यू झाला.
दरम्यान, मंगळवेढ्यात अंत्यविधी व इतर कडक धार्मिक विधी झाल्यानंतर व मनस्थिती सावरल्यानंतर यवत पोलीस ठाण्यात तक्रार दिली आहे. यवत पोलिसांनी याप्रकरणी फरार टेम्पो चालकाविरुद्ध गुन्हा दाखल केला आहे. या गुन्ह्याचा पुढील तपास पोलीस हवालदार सोनावणे करत आहेत.
