बीड: बीड जिल्ह्यातील केज तालुक्यातील विलास घुले हत्या प्रकरणावरून राजकीय वातावरण तापले आहे. या प्रकरणातील एका आरोपीला अद्याप अटक करण्यात आलेली नसल्याचा आरोप करत माजी मंत्री तथा आमदार धनंजय मुंडे यांनी पोलिसांच्या भूमिकेवर गंभीर प्रश्न उपस्थित केले आहेत.
टाकळी गावात जाऊन धनंजय मुंडे यांनी मृत विलास घुले यांच्या कुटुंबीयांची भेट घेत त्यांचे सांत्वन केले. यावेळी त्यांनी या प्रकरणात न्याय मिळवून देण्यासाठी मुख्यमंत्री देवेंद्र फडणवीस यांची भेट घेऊन पाठपुरावा करणार असल्याचे आश्वासन दिले.
यावेळी प्रसारमाध्यमांशी बोलताना धनंजय मुंडे म्हणाले, “एका आरोपीला अटक होत नाही, तो पोलिसांचा लाडका आहे का? एकाला एक न्याय आणि दुसऱ्याला दुसरा न्याय असं चालणार नाही. आमचा कोणाशीही वैयक्तिक वाद नाही, पण न्यायासाठी आम्ही ताकदीने आंदोलन करू.”
विलास घुले हत्या प्रकरणातील पुरवणी जबाबात खासदार बजरंग सोनवणे यांचे पुत्र सौरभ सोनवणे याचे नाव आल्याचा दावा करण्यात येत असून, त्यालाही या प्रकरणात आरोपी करून अटक करण्याची मागणी घुले कुटुंबीयांकडून केली जात आहे.
धनंजय मुंडे यांच्या भेटीदरम्यान विलास घुले यांचे भाऊ रमेश घुले यांना अश्रू अनावर झाले. कुटुंबीयांनी या प्रकरणातील सर्व आरोपींवर कठोर कारवाई करून न्याय मिळवून देण्याची मागणी पुन्हा एकदा केली.
