पुणे : जंतर-मंतर येथील यशस्वी आंदोलनानंतर अभिजीत दिपके यांच्या नेतृत्वाखालील ‘कॉकरोच जनता पार्टी’ने (CJP) आता देशभरात पक्षविस्ताराची घोषणा केली आहे. आगामी 6 महिन्यांत सर्व राज्ये आणि लोकसभा मतदारसंघांमध्ये पक्षाच्या समन्वय समित्या स्थापन केल्या जातील. सध्या जाहीर केलेल्या यादीव्यतिरिक्त इतर कोणत्याही पदाधिकाऱ्याची नियुक्ती करण्यात आलेली नाही, असे पक्षाकडून स्पष्ट करण्यात आले आहे.
पक्षाची घोषित झालेली राष्ट्रीय कार्यकारिणी खालीलप्रमाणे आहे:
संस्थापक व राष्ट्रीय संयोजक: अभिजीत दीपके
सहसंयोजक: आशुतोष रांका आणि सौरव दास
राष्ट्रीय संघटन प्रभारी: अजिंक्य शिंदे (सहप्रभारी: दीपक बालियान)
राष्ट्रीय सचिव: आफरीन नवाज
विभागीय प्रभारी: उत्तर – दीपक बालियान, दक्षिण – विजय रेड्डी मल्लांगी (वय 30), पूर्व व ईशान्य – अंकित भारद्वाज (वय 35), पश्चिम – योगेश इंगळे
इतर प्रमुख पदे: रत्ना सिंह (कायदेविषयक), वैष्णवी गौड (रिसर्च व पॉलिसी), रोहन देशपांडे (तंत्रज्ञान), योगेश इंगळे (वित्त), आणि विजय रेड्डी मल्लांगी (मीडिया)
एकीकडे पक्षविस्ताराची तयारी सुरू असतानाच छत्रपती संभाजीनगर येथे अंतर्गत असंतोष उफाळून आला आहे. अभिजीत दीपके यांच्या घरासमोर काही तरुण कार्यकर्त्यांनी निदर्शने करत पक्षात घराणेशाही आणि पक्षपाताचा आरोप केला. जंतर-मंतरवरील आंदोलनात जवळपास 450 समन्वयक सहभागी झाले होते; मात्र नुकत्याच झालेल्या कोअर कमिटीच्या बैठकीत केवळ दीपके यांच्या निकटवर्तीयांनाच स्थान देऊन मुख्य कार्यकर्त्यांना डावलण्यात आल्याचा दावा आंदोलकांनी केला आहे.
हे आंदोलन कोणत्याही एका व्यक्तीचे नसून संपूर्ण देशातील युवकांचे होते, अशी भूमिका त्यांनी मांडली. याप्रकरणी पक्षाचे प्रवक्ते आशुतोष रांका यांच्याशी चर्चा झाली असली तरी त्यांच्याकडून कोणतेही ठोस उत्तर मिळाले नसल्याचे कार्यकर्त्यांचे म्हणणे आहे.
