पुणे: पुण्यातील व्यावसायिक केतन अग्रवाल हत्याप्रकरणात पुणे ग्रामीण पोलिसांच्या तपासातून आणखी एक महत्त्वाचा खुलासा समोर आला आहे. आरोपी सिया गोयल आणि चेतन चौधरी यांनी केतनची हत्या करण्यासाठी लोहगड किल्ल्याची निवड ही अचानक केली नव्हती, तर त्यामागे आधीपासून आखलेले नियोजन असल्याची माहिती तपासातून पुढे आली आहे.
पोलिसांच्या माहितीनुसार, केतन अग्रवालला ट्रेकिंगची प्रचंड आवड होती आणि ही बाब सिया गोयलला चांगलीच माहिती होती. याच आवडीचा फायदा घेत त्याला लोहगड किल्ल्यावर नेण्याचा कट रचण्यात आला.
तपासात समोर आलेल्या माहितीनुसार, मे महिन्याच्या शेवटच्या आठवड्यात सिया आणि केतन लोहगडावर गेले होते. हा केवळ ट्रेक नसून संपूर्ण परिसराची रेकी करण्यासाठीच हा दौरा करण्यात आल्याचा संशय पोलिसांनी व्यक्त केला आहे. या भेटीदरम्यान सियाने किल्ल्यावरील सीसीटीव्ही कॅमेरे, त्यांची ठिकाणे आणि कॅमेऱ्यांच्या नजरेपासून दूर असलेले भाग यांची माहिती गोळा केल्याचे तपासात समोर आले आहे.
याशिवाय, लोहगडावरील विविध मार्ग, कड्यांची ठिकाणे आणि परिसराची माहिती मिळवण्यासाठी आरोपींनी गुगल आणि यूट्यूबवर लोहगड किल्ल्याचे अनेक व्हिडिओ पाहिल्याचेही पोलिसांच्या तपासातून निष्पन्न झाले आहे.
पोलिसांच्या तपासानुसार, १८ जून रोजी केतन अग्रवालला नियोजनपूर्वक लोहगडावर नेण्यात आले आणि त्याठिकाणी त्याची हत्या करण्यात आली. त्यानंतर पुरावे नष्ट करण्यासाठी आरोपींनी मोबाईलमधील काही डेटा डिलीट करण्याचाही प्रयत्न केल्याची माहिती समोर आली आहे.
या प्रकरणात पुणे ग्रामीण पोलीस सिया गोयल आणि चेतन चौधरी यांची कसून चौकशी करत असून, हत्येच्या कटाशी संबंधित आणखी तांत्रिक पुरावे आणि माहिती समोर येण्याची शक्यता व्यक्त केली जात आहे.
