पुणे : पुणे महानगरपालिकेतील कथित भ्रष्टाचार आणि आर्थिक गैरव्यवहारावरून राजकीय वातावरण तापले आहे. काँग्रेसचे माजी शहराध्यक्ष अरविंद तुकाराम शिंदे यांनी थेट राष्ट्रीय स्वयंसेवक संघाचे (RSS) सरसंघचालक डॉ. मोहन भागवत यांना पत्र लिहून गंभीर आरोप केले आहेत. या पत्रामुळे भाजप आमदार योगेश टिळेकर अडचणीत येण्याची शक्यता वर्तवली जात आहे.
काँग्रेसचे माजी शहराध्यक्ष अरविंद तुकाराम शिंदे यांनी पाठवलेल्या पत्रातील प्रमुख मुद्दे आणि आरोप:
167 कोटींचा निविदा वाद: घनकचरा व्यवस्थापन विभागातील टेंडर क्रमांकावरून शिंदे यांनी आरोप केला आहे. आमदार योगेश टिळेकर यांच्याशी संबंधित असलेल्या ‘भूमिश्रीन’ कंपनीला फायदा पोहोचवण्यासाठी नियमांमध्ये बदल करण्यात आले. मूळ स्वरूपातील कामांचा खर्च वाढवून महापालिकेच्या तिजोरीवर कोट्यवधी रुपयांचा अतिरिक्त भार टाकला जात असल्याचा दावा पत्रात केला आहे.
प्रशासनावर टीका: शहरातील विकासकामे, रस्ते, नदी सुधारणा प्रकल्प, 24×7 पाणीपुरवठा आणि कचरा व्यवस्थापन यांसारख्या योजनांमध्ये मोठ्या प्रमाणावर गैरव्यवहार होत असल्याचे पत्रात म्हटले आहे. वरिष्ठ नेत्यांच्या नावाचा वापर करून निर्णय लादले जात असल्याचे शिंदे यांनी अधोरेखित केले.
स्थानिक नेतृत्वाची भूमिका: भाजपचे शहराध्यक्ष धीरज घाटे, महापौर मंजुषा नागपुरे, स्थायी समिती अध्यक्ष श्रीनाथ भिमाले आणि सभागृह नेते गणेश बिडकर यांच्या मौनावर पत्रातून प्रश्न उपस्थित करण्यात आले आहेत. तसेच, केंद्रीय राज्यमंत्री मुरलीधर मोहोळ, खासदार मेधा कुलकर्णी आणि नगरविकास राज्यमंत्री माधुरी मिसाळ यांच्याशी संबंधित राजकीय घडामोडींवर आणि निर्णयांच्या दुटप्पीपणावर टीका करण्यात आली आहे.
अरविंद शिंदे यांनी पत्राच्या शेवटी नमूद केले की, संघ शिस्त आणि मूल्यांचे संस्कार देण्याचे दावे करतो परंतु सत्तेत आलेले नेते या मूल्यांचा अवमान करत आहेत. पुणेकरांच्या पैशांची लूट थांबवण्यासाठी संघाने या प्रकरणात हस्तक्षेप करून संबंधितांचे कान उपटावेत, असे आवाहन त्यांनी केले आहे.या पत्रामुळे भाजप आमदार योगेश टिळेकर यांच्या अडचणीत वाढ होणार आहे.
