बारामती: बारामती एमआयडीसी परिसरात भरधाव कारने स्कूटीला दिलेल्या धडकेत दोन महिलांचा मृत्यू झाल्याची दुर्दैवी घटना घडली. गुरुवारी, 27 ऑगस्ट रोजी दुपारी सव्वा 1 वाजण्याच्या सुमारास हिरकणी गोडाऊनसमोर हा अपघात झाला. या घटनेनंतर परिसरात हळहळ व्यक्त केली जात आहे.
मिळालेल्या माहितीनुसार, संगीता प्रदीप लोंढे (38) आणि मनीषा बबन शिंदे (43) या दोघी स्कूटीवरून प्रवास करत होत्या. हिरकणी गोडाऊनच्या परिसरातून जात असताना त्यांच्या मागून आलेल्या किया सोनेट कारने त्यांच्या वाहनाला जोरदार धडक दिली. कारचा वेग अधिक असल्याने हा अपघात अत्यंत गंभीर झाला.
धडकेनंतर दोन्ही महिला रस्त्यावर फेकल्या गेल्या. त्यांना गंभीर दुखापत झाली. अपघातानंतर तातडीने मदत करण्याचे प्रयत्न करण्यात आले. मात्र, दुखापती गंभीर असल्याने संगीता लोंढे आणि मनीषा शिंदे यांचा मृत्यू झाला. अचानक घडलेल्या या दुर्घटनेमुळे त्यांच्या कुटुंबीयांवर मोठे संकट कोसळले आहे.
अपघाताची माहिती मिळताच पोलिसांनी घटनास्थळी जाऊन परिस्थितीची पाहणी केली. वाहनावरील नियंत्रण सुटल्याने हा प्रकार घडल्याचे प्राथमिक माहितीतून समोर आले आहे.
या प्रकरणी प्रदीप बबन लोंढे (48, रा. पिंपरद, ता. फलटण, जि. सातारा) यांनी बारामती तालुका पोलिस ठाण्यात तक्रार दाखल केली. त्यांच्या तक्रारीनुसार कारचालक शुभम शिवाजी खामकर (रा. पाटस, तामखंडा) याच्याविरोधात गुन्हा नोंदवण्यात आला आहे.
पोलिसांच्या माहितीनुसार, भरधाव आणि निष्काळजीपणे वाहन चालवल्याचा आरोप कारचालकावर करण्यात आला असून अधिक तपास सुरु आहे.
