पुणे : मुख्यमंत्री माझी लाडकी बहीण योजनेच्या अंतर्गत जुलै महिन्याचे अनुदान वितरण सुरू झाले असून रक्षाबंधनच्या आधी कोट्यवधी महिलांच्या खात्यात पैसे जमा झाले आहेत. रक्षाबंधनच्या काळात 1 कोटी 41 लाखांहून अधिक महिलांना प्रत्येकी 1500 रुपये देण्यात आले आहेत. उर्वरित पात्र महिलांच्या खात्यात देखील ही रक्कम लवकरच जमा केली जाईल.
तथापि, विविध निकषांच्या पडताळणीनंतर अनेक अर्जदार महिला अपात्र ठरल्या आहेत. सुमारे 53 हजारांपेक्षा जास्त महिलांना या हप्त्याचा लाभ मिळू शकलेला नाही. यामध्ये 65 वर्षांपेक्षा जास्त वय झालेल्या महिलांची संख्या सर्वाधिक आहे. योजनेच्या नियमानुसार 21 ते 65 वर्षे वयोगटातील महिलाच यासाठी पात्र असतात. वयोमर्यादा ओलांडल्यामुळे या महिलांना मिळणारे आर्थिक अनुदान थांबवण्यात आले आहे.
या योजनेची सुरुवात जून 2024 मध्ये झाली होती. सुरुवातीला अर्जदारांची संख्या खूप मोठी होती. मात्र आधार कार्डची पडताळणी, ई-केवायसी (e-KYC), कौटुंबिक उत्पन्न, सरकारी नोकरीतील सदस्य आणि इतर योजनांचा लाभ या सर्व गोष्टींची तपासणी केल्यानंतर सुमारे 92 लाख अर्ज अपात्र ठरले. यामुळे सुरुवातीच्या 2 कोटी 48 लाख अर्जांमधून पात्र लाभार्थ्यांची संख्या आता सुमारे 1.65 कोटी झाली आहे.
शासनाकडून थेट बँक खात्यात पैसे जमा करण्याची प्रक्रिया वेगाने पूर्ण केली जात आहे. सामाजिक न्याय आणि वित्त विभागाकडून निधी उपलब्ध झाल्यानंतर तातडीने वितरण सुरू करण्यात आले. तांत्रिक कारणांमुळे किंवा पडताळणी प्रक्रियेमुळे ज्या महिलांचे पैसे अद्याप जमा झालेले नाहीत, त्यांच्या खात्यातही लवकरच रक्कम वर्ग होणार आहे. महिलांचे आर्थिक सक्षमीकरण करणे आणि त्यांना आधार देणे हा या योजनेचा मुख्य उद्देश आहे.
