लोणीकंद : जुन्या घरगुती मालमत्ता व व्यावसायिक वादातून लोणीकंद (ता. हवेली) येथे दोन कुटुंबांमध्ये जोरदार हाणामारी झाल्याची घटना समोर आली आहे. या राड्यात माजी जिल्हा परिषद सदस्य शंकर रामचंद्र भुमकर यांच्यासह त्यांच्या मुलाला लाकडी बांबू, दगड, लाथा-बुक्क्यांनी मारहाण करण्यात करण्यात आली आहे. या मारहाणीत एकजण गंभीर जखमी झाला असून लोणीकंद पोलीस ठाण्यात आठ जणांविरुद्ध गुन्हा दाखल करण्यात आला आहे.
याप्रकरणी शंकर भुमकर यांनी लोणीकंद पोलिस ठाण्यात तक्रार दिली आहे. त्यानुसार शंकर भुमकर यांचे भाऊ उध्दव रामचंद्र भुमकर (वय-66) पुतण्या पांडुरंग दत्तात्रय भुमकर (वय-48 ), स्वप्नील दत्तात्रय भुमकर (वय-44) नातु अनिश पांडुरंग भुमकर (वय 19) विनायक स्वप्नील भुमकर (अंदाजे वय 18), सुन स्वाती पांडुरंग, नातु श्रेयश पांडुरंग भुमकर (वय-21), भुमकर (वय-42) व मृणाल स्वप्नील भुमकर (वय-38 सर्व रा. सगुणा निवास लोणीकंद ता. हवेली जि. पुणे) यांच्यावर गुन्हा दाखल करण्यात आला आहे.
पोलिसांनी दिलेल्या माहितीनुसार शंकर भुमकर हे पत्नी रुपाली आणि मुलगा सिद्धांत यांच्यासह लोणीकंद येथील सगुणा निवास येथे राहतात. त्यांची शिक्षण संस्था तसेच खडी क्रेशरचा व्यवसाय आहे. त्यांच्या सख्ख्या तीन भावांसोबत 2017-18 पासून घरगुती मालमत्ता आणि व्यवसायाचा वाद सुरू असल्याचे त्यांनी पोलिसांना दिलेल्या जबाबात म्हटले आहे. या वादातून यापूर्वीही शिवीगाळ, धमक्या आणि त्रास दिल्याच्या तक्रारी पोलिसांकडे करण्यात आल्याचे त्यांनी सांगितले.
शंकर भुमकर हे घराच्या टेरेसवर 25 ऑगस्ट रोजी रात्री साडेआठच्या सुमारास व्यायाम करत होते. त्यावेळी इमारतीखाली मोठ्याने भांडणाचा आवाज ऐकू आल्याने ते तातडीने खाली आले. त्यावेळी उद्धव भुमकर, पांडुरंग भुमकर, स्वप्नील भुमकर, श्रेयश भुमकर, अनिश भुमकर, विनायक भुमकर, स्वाती भुमकर आणि मृणाल भुमकर हे सिद्धांतला मारहाण करत होते. मुलाला सोडवण्यासाठी शंकर भुमकर मध्ये पडले असता पांडुरंग, स्वप्नील आणि विनायक यांनी दगड, हात आणि लाथा-बुक्क्यांनी त्यांनाही मारहाण केल्याचे त्यांनी सांगितले. भांडण सोडवण्यासाठी पत्नी आणि मुलगी खाली आल्यानंतर त्यांनाही धक्काबुक्की करण्यात आली आहे.
या हल्ल्यादरम्यान उद्धव भुमकर याने खिळे लावलेल्या लाकडी बांबूने सिद्धांतच्या डोक्यात मारल्याने तो गंभीर जखमी झाला. मारहाणीनंतर सिद्धांत रक्तबंबाळ अवस्थेत खाली पडला. शेजाऱ्यांनी भांडण सोडवण्याचा प्रयत्न केला. त्यानंतर कुटुंबीयांनी सिद्धांतला उपचारासाठी प्रथम लोणीकंद पोलिस ठाण्यात आणले. पोलिसांनी दिलेल्या उपचाराच्या यादीच्या आधारे त्याला ससून रुग्णालयात दाखल करण्यात आले.
ससूनमध्ये उपचार सुरू असताना सिद्धांतला उलट्या होऊन प्रकृती बिघडल्याने 26 ऑगस्ट रोजी त्याला पुण्यातील रुबी हॉल क्लिनिकमध्ये दाखल करण्यात आले. मुलाच्या प्रकृतीकडे लक्ष देत असल्याने तक्रार देण्यास विलंब झाल्याचे शंकर भुमकर यांनी पोलिसांना सांगितले. या प्रकरणात नातेवाईकांनी एकत्र येऊन बेकायदेशीर जमाव करून मुलगा सिद्धांत याला मारहाण केली तसेच त्याला वाचवण्यासाठी गेलेल्या कुटुंबीयांनाही शिवीगाळ, मारहाण आणि जीवे मारण्याच्या धमक्या दिल्याचा आरोप करण्यात आला आहे.
दरम्यान, या घटनेमुळे लोणीकंद परिसरात खळबळ उडाली असून, जुन्या कौटुंबिक वादाला हिंसक वळण कसे मिळाले, याचा पोलिस तपास सुरू आहे. तक्रारीतील आरोपांची सत्यता तपासानंतर स्पष्ट होणार आहे.
