मुंबई : नवी मुंबईतील खारघर परिसरात निवडणूक आयोगाचे गोपनीय SIR फॉर्म अनधिकृतपणे झेरॉक्स करताना सापडल्याने खळबळ उडाली आहे. या गंभीर निष्काळजीपणाप्रकरणी 5 मतदान केंद्रस्तरीय अधिकाऱ्यांना निलंबित करण्याचे आदेश देण्यात आले असून एका राजकीय पक्षाच्या पदाधिकाऱ्यावर गुन्हा दाखल करण्यात आला आहे.
मिळालेल्या माहितीनुसार, 27 ऑगस्ट 2026 रोजी सायंकाळी 5.30 च्या सुमारास खारघर सेक्टर 19 मधील एका झेरॉक्स सेंटरमध्ये हा प्रकार उघडकीस आला. ठाकरे सेनेचे नेते प्रसाद भोईर यांनी या गैरप्रकाराबाबत प्रशासनाकडे तक्रार केली होती. त्यानंतर सहाय्यक मतदार नोंदणी अधिकाऱ्यांनी तातडीने तेथे जाऊन पाहणी केली असता, भाजपचे स्थानिक पदाधिकारी सूरज पाटील हे SIR फॉर्मच्या प्रती काढताना आढळून आले.
तपासात संशयित व्यक्तीकडून सुमारे 3400 गोपनीय SIR फॉर्म जप्त करण्यात आले.हे अर्ज एकूण 11 विविध मतदान केंद्रांशी संबंधित असल्याचे स्पष्ट झाले. यातील 5 केंद्रांचे प्रत्येकी 100 पेक्षा जास्त, तर 6 केंद्रांचे प्रत्येकी 1 अर्ज सापडले.निवडणूक आयोगाची अतिसंवेदनशील माहिती बाहेरील व्यक्तीकडे कशी गेली, याचा शोध घेतला जात असून खारघर पोलीस ठाण्यात भारतीय न्याय संहिता व लोकप्रतिनिधित्व कायद्यानुसार FIR नोंदवण्यात आला आहे.
ज्या पाच कर्मचाऱ्यांच्या निष्काळजीपणामुळे हे फॉर्म बाहेर गेले, त्यांना कारणे दाखवा नोटीस पाठवण्यात आली आहे. पनवेल महानगरपालिका आयुक्तांना या कर्मचाऱ्यांना तात्काळ सेवेतून निलंबित करून शिस्तभंगाची कारवाई करण्याचे निर्देश मिळाले आहेत.
प्रकरणाची सखोल चौकशी करण्यासाठी पनवेल पालिकेचे उपायुक्त नानासाहेब कामठे यांची चौकशी अधिकारी म्हणून नियुक्ती करण्यात आली आहे. रायगडचे जिल्हाधिकारी किशन जावळे यांनी दिलेल्या माहितीनुसार, या संपूर्ण प्रकरणाचा पोलीस तपास वेगाने सुरू आहे.
