पुणे: पुण्यातील हिंजवडी पोलिसांनी अमली पदार्थांच्या तस्करीविरोधात कारवाई करत 2 जणांना ताब्यात घेतले आहे. वाकड परिसरातील विनोदे वस्ती येथे पोलिसांनी सापळा रचून ही कारवाई केली. या वेळी मेफेड्रॉन (MD) हा अमली पदार्थ विक्रीसाठी घेऊन आलेल्या तरुणाला पकडण्यात आले. त्याच्याकडून 249 ग्रॅम मेफेड्रॉन जप्त करण्यात आले असून, त्याची किंमत 12 लाख 45 हजार रुपये असल्याचे सांगण्यात आले आहे.
या प्रकरणात प्रमेंद्रसिंह भेरूसिंह (वय 31, रा. खुडाला फालना, जिल्हा पाली, राजस्थान) आणि दिनेशकुमार मगाराम चौधरी (वय 28, मूळ रा. खुडाला फालना, राजस्थान; सध्या रा. फडके हौद चौक, रविवार पेठ, पुणे) यांना अटक करण्यात आली आहे.
पोलिसांना 8 ऑक्टोबर रोजी विनोदे कॉर्नर परिसरात मेफेड्रॉन विक्रीसाठी एक तरुण येणार असल्याची माहिती मिळाली होती. त्यानंतर हिंजवडी पोलीस ठाण्याच्या तपास पथकाने वाकडमधील विनोदे वस्ती परिसरात लक्ष ठेवून सापळा रचला.
मिळालेल्या माहितीनुसार, प्रमेंद्रसिंह हा दुचाकीवरून घटनास्थळी पोहोचताच पोलिसांनी त्याला ताब्यात घेतले. दुचाकीची झडती घेतली असता त्यामध्ये 249 ग्रॅम मेफेड्रॉन आढळले. पोलिसांनी अमली पदार्थांसह 2 मोबाईल फोन आणि दुचाकीही जप्त केली आहे. या सर्व मुद्देमालाची एकूण किंमत 13 लाख 45 हजार रुपये असल्याचे सांगण्यात आले आहे.
या प्रकरणी दोन्ही आरोपींविरोधात अमली पदार्थ प्रतिबंधक कायद्यानुसार हिंजवडी पोलीस ठाण्यात गुन्हा दाखल करण्यात आला आहे. जप्त केलेले अमली पदार्थ कुठून आणले होते आणि त्यांची विक्री कोणाला केली जाणार होती, याचा तपास सुरू आहे. या तस्करीच्या साखळीत आणखी व्यक्ती सहभागी आहेत का, याचाही शोध पोलीस घेत आहेत.
