बारामती, ता. 18 : बारामती तालुक्यातील देऊळगाव रसाळ येथे विहिरीचे खोदकाम सुरू असताना अचानक माती व दगडांची मोठी दरड कोसळून चुलते-पुतण्याचा दुर्दैवी मृत्यू झाला. मच्छिंद्र रसाळ (वय-50) आणि अमोल रसाळ (वय-26) अशी मृतांची नावे आहेत. एकाच कुटुंबातील दोघांचा अशा प्रकारे अंत झाल्याने रसाळ कुटुंबावर दुःखाचा डोंगर कोसळला असून, संपूर्ण गावावर शोककळा पसरली आहे.

मिळालेल्या प्राथमिक माहितीनुसार, देऊळगाव रसाळ येथील एका शेतात विहिरीचे खोदकाम सुरू होते. काम सुरू असतानाच अचानक विहिरीच्या कडेला असलेली माती आणि दगडांचा मोठा ढिगारा खाली कोसळला. या दरडीखाली मच्छिंद्र रसाळ आणि अमोल रसाळ दोघेही गाडले गेले. दरड अचानक कोसळल्याने त्यांना सावरण्याची किंवा बाहेर पडण्याची संधीही मिळाली नाही.
घटनेची माहिती मिळताच स्थानिक नागरिकांनी तातडीने घटनास्थळी धाव घेत बचावकार्य सुरू केले. मात्र, ढिगाऱ्याखाली दबले गेल्याने दोघांचाही मृत्यू झाला होता. या घटनेने परिसरात एकच खळबळ उडाली.

दरम्यान, एकाच कुटुंबातील चुलते-पुतण्याचा अशा प्रकारे दुर्दैवी अंत झाल्याने नातेवाईक आणि ग्रामस्थांमधून तीव्र हळहळ व्यक्त होत आहे. घटनेची माहिती मिळताच स्थानिक प्रशासनाने घटनास्थळी धाव घेतली. विहिरीच्या खोदकामादरम्यान घडलेल्या या दुर्घटनेमुळे कामाच्या ठिकाणी सुरक्षिततेचा प्रश्न पुन्हा ऐरणीवर आला आहे.








