सिंधुदुर्ग : जिल्ह्यातील कुडाळ तालुक्यातून एक अत्यंत संतापजनक आणि हादरवून टाकणारी घटना समोर आली आहे. वर्दे कडावल गावात एका तरुणाने एकतर्फी प्रेमातून महाविद्यालयीन युवतीची निर्घृण हत्या केल्याची दुर्दैवी घटना घडली आहे. दामिनी पालव असे मृत तरुणीचे नाव असून, याप्रकरणी पोलिसांनी आरोपी साहिल धुरी याला बेड्या ठोकल्या आहेत.
पोलीस सूत्रानुसार, सोशल मीडियाच्या माध्यमातून मृत दामिनी आणि आरोपी साहिल यांची ओळख झाली होती. या ओळखीचे रूपांतर हळूहळू साहिलच्या मनात एकतर्फी प्रेमात झाले. मात्र, दामिनीने त्याच्या प्रेमाला स्पष्ट नकार दिला होता. नुकतेच दामिनीचे लग्न ठरल्याची माहिती साहिलला समजली. याच गोष्टीचा प्रचंड राग मनात धरून त्याने दामिनीचा जीव घेण्याचे भयानक पाऊल उचलले.
घटनेच्या दिवशी दामिनी कॉलेजवरून एसटी बसने प्रवास करून आपल्या गावी परतत होती. ती गावात उतरून घराकडे जात असताना आरोपी साहिल आधीच तिथे दबा धरून थांबला होता. त्याने वाटेत दामिनीला गाठले आणि पुन्हा एकदा प्रेमाचा स्वीकार करण्यासाठी जबरदस्ती केली. दामिनीने त्याचा हा प्रस्ताव पुन्हा एकदा झटकून दिला. या नकारामुळे संतापलेल्या नराधमाने तिच्यावर धारदार शस्त्राने बेछूट वार केले. या प्राणघातक हल्ल्यात गंभीर जखमी झाल्यामुळे जागीच दामिनीचा मृत्यू झाला.
या धक्कादायक घटनेनंतर संपूर्ण सिंधुदुर्ग जिल्ह्यात खळबळ उडाली असून नागरिकांमध्ये तीव्र संताप उसळला आहे. घटनेची गंभीर दखल घेत स्थानिक गुन्हे अन्वेषण विभागाच्या पोलिसांनी तातडीने सूत्रे हलवली. तपास करत पोलिसांनी आरोपी साहिल धुरी याला रात्री त्याच्याच घरातून ताब्यात घेतले. तसेच त्याच्या अंगावरील रक्ताने माखलेले कपडे देखील जप्त करण्यात आले असून त्याला आज न्यायालयात हजर केले जाणार आहे.
या दुर्दैवी घटनेने कॉलेज तरुणी आणि महिलांच्या सुरक्षेचा प्रश्न पुन्हा एकदा ऐरणीवर आला आहे. सोशल मीडियाचा वापर करताना तरुण-तरुणींनी आणि पालकांनी विशेष काळजी घेणे गरजेचे बनले आहे. सोशल मीडियावर कोणाला आपली मैत्री यादीत जोडावे आणि कोणाशी संवाद साधावा, याची पडताळणी करणे अत्यंत महत्त्वाचे असल्याचे या घटनेने पुन्हा एकदा दाखवून दिले आहे. पोलीस या प्रकरणाचा अधिक तपास करत असून लवकरात लवकर कठोर कारवाई करण्याची मागणी नागरिकांमधून होत आहे.
