बारामती, ता. 17 : सार्वजनिक रस्त्यावर वाहतुकीला अडथळा निर्माण होईल अशा पद्धतीने वाहने उभी करणाऱ्यांविरोधात बारामती विभाग पोलिसांनी धडक कारवाई केली. शनिवारी (ता. 17) करण्यात आलेल्या विशेष मोहिमेत सात वाहनांवर कारवाई करून ती जप्त करण्यात आली. याप्रकरणी बारामती तालुका पोलीस ठाण्याच्या हद्दीत पाच, तर बारामती शहर पोलीस ठाण्याच्या हद्दीत दोन गुन्हे दाखल करण्यात आले आहेत.

सार्वजनिक रस्त्यांवर बेशिस्त पार्किंगमुळे वाहतूक कोंडी होण्याबरोबरच पादचारी आणि वाहनचालकांच्या सुरक्षिततेलाही धोका निर्माण होतो. याची दखल घेत पोलिसांनी भारतीय न्याय संहिता, २०२३ मधील कलम २८५ अन्वये संबंधित वाहनमालकांविरुद्ध कायदेशीर कारवाई केली आहे. या प्रकरणांचा तपास सुरू असून, पुढील कार्यवाही करण्यात येणार आहे.
मोटार वाहन कायद्यानुसार सार्वजनिक ठिकाणी इतरांना धोका किंवा अडथळा निर्माण होईल अशा पद्धतीने वाहन उभे करता येत नाही. चुकीच्या पार्किंगमुळे रुग्णवाहिका, अग्निशमन दल आणि अन्य आपत्कालीन सेवांच्या वाहनांनाही अडथळा निर्माण होऊ शकतो.

ही कारवाई पोलीस अधीक्षक संदीपसिंह गिल्ल, अपर पोलीस अधीक्षक गणेश बिरादार आणि उपविभागीय पोलीस अधिकारी चैतन्य कदम यांच्या मार्गदर्शनाखाली करण्यात आली. संबंधित पोलीस अधिकारी आणि वाहतूक विभागाच्या पथकाने मोहिमेत सहभाग घेतला.

पोलिसांचे आवाहन : वाहनचालकांनी अधिकृत पार्किंगचा वापर करावा. रस्ते, चौक, पादचारी मार्ग तसेच घर-दुकानांची प्रवेशद्वारे अडवून वाहने उभी करू नयेत. चुकीच्या पार्किंगमुळे अडथळा निर्माण करणाऱ्यांवर यापुढेही कायदेशीर कारवाई करण्यात येणार असल्याचा इशारा पोलिसांनी दिला आहे.







