पुणे : पुण्यात पतीने पत्नीला तिच्या प्रियकरासोबत रंगेहात पकडल्यानंतर उद्भवलेल्या वादातून पतीलाच बेदम मारहाण करून त्याचे पैसे लुटल्याची घटना उघडकीस आली आहे. याप्रकरणी गुन्हे शाखेच्या युनिट 4 च्या पथकाने तत्परतेने कारवाई करत प्रियकर गणेश अशोक रेड्डी (वय 36) आणि त्याचा मामा राजू तिमय्या राव उर्फ धोत्रे (वय 51, दोघे रा. बोपोडी) या दोघांना अटक केली आहे.
समोर आलेल्या माहितीनुसार, पेशाने रिक्षाचालक असलेल्या तक्रारदाराने दिलेल्या माहितीनुसार, 10 जून 2026 रोजी रात्रीच्या सुमारास लोहगाव विमानतळ परिसरात ते प्रवाशाची वाट पाहत होते. त्यावेळी त्यांची पत्नी प्रियकर गणेश रेड्डीसोबत बुलेटवरून जात असताना त्यांना दिसली. त्यांनी तत्काळ त्यांचा पाठलाग केला आणि फॉरेस्ट पार्क रोडवर रिक्षा आडवी घालून त्यांना थांबवले. पतीने तिथे पत्नीकडे विचारणा केली असता वाद सुरू झाला.
संवादादरम्यान रागाच्या भरात प्रियकर गणेशने फिर्यादीला काठीने मारहाण करण्यास सुरुवात केली. तसेच पत्नीनेही पतीला मारहाण केली. त्याच वेळी गणेशचा मामा राजू धोत्रे तेथे पोहोचला आणि त्यानेही फिर्यादीला लाथाबुक्क्यांनी झोडपून काढले. या गोंधळाचा फायदा घेत गणेशने तक्रारदाराच्या खिशातील 18,000 रुपये जबरदस्तीने काढून घेतले. जखमी अवस्थेत ससून रुग्णालयात उपचार घेतल्यानंतर पतीने कौटुंबिक पातळीवर मध्यस्थीचा प्रयत्न केला; मात्र पत्नी परत न आल्याने अखेर 8 ऑगस्ट 2026 रोजी लोहगाव पोलिस ठाण्यात गुन्हा दाखल करण्यात आला.
25 ऑगस्ट रोजी खडकी परिसरात गस्त घालत असताना पोलिस अंमलदार अनिकेत भोसले आणि जहांगीर पठाण यांना आरोपी औंध येथील भक्ती प्लाझा अपार्टमेंटजवळ थांबल्याची गुप्त माहिती मिळाली. पोलिसांनी तातडीने सापळा रचून दोन्ही आरोपींना ताब्यात घेतले आणि पुढील तपासासाठी लोहगाव पोलिसांच्या सुपूर्द केले.
वरिष्ठ पोलिस निरीक्षक कांचन जाधव, पोलिस उपनिरीक्षक वैभव मगदुम, दिग्विजय चौगले व त्यांच्या पथकाने ही यशस्वी कामगिरी बजावली.
