पुणे : मागील साडेचार वर्षांपासून सुरू असणारे रशिया आणि युक्रेनमधील युद्ध दिवसेंदिवस अधिक तीव्र होत चालले आहे. आज युक्रेनची राजधानी कीववर रशियाने केलेल्या भीषण एअर स्ट्राइकमुळे संपूर्ण शहर हादरून गेले. या प्राणघातक हल्ल्यात किमान 27 जणांचा दुर्दैवी मृत्यू झाला असून अनेक जण गंभीर जखमी झाले आहेत.
रशियाच्या या हवाई हल्ल्यात 50 हून अधिक इमारतींचे अतोनात नुकसान झाले आहे. अनेक ठिकाणी भीषण आग लागल्यामुळे परिसरातील हॉटेल्स, रेस्टॉरंट्स आणि निवासी घरे जळून खाक झाली. घटनेची माहिती मिळताच आपत्कालीन यंत्रणांनी तातडीने मदतकार्य सुरू करून 380 हून अधिक नागरिकांना सुरक्षित बाहेर काढले.
या दुर्घटनेनंतर युक्रेनचे राष्ट्राध्यक्ष व्होलोडिमिर झेलेन्स्की यांनी प्रशासकीय निष्काळजीपणावर तीव्र ताशेरे ओढले आहेत. आंतरराष्ट्रीय नियमांनुसार लोकवस्तीच्या भागात दारूगोळा साठवण्यास सक्त मनाई आहे. तरीही रहिवासी परिसरात दारूगोळा का ठेवला गेला, याची सखोल चौकशी करण्याचे आदेश त्यांनी दिले आहेत.
तसेच बुचामधील मायला गावातील एका गोदामावर झालेल्या हल्ल्यात वयोवृद्ध आणि दिव्यांगांच्या आश्रमाचेही मोठे नुकसान झाल्याचे त्यांनी सांगितले. सैन्य दलाचे प्रमुख टिमूर टकाचेंको यांनी या हल्ल्यामुळे नागरी वस्तीचे झालेले नुकसान अतिशय गंभीर असल्याचे स्पष्ट केले.
युक्रेनचे पंतप्रधान सेरगी कोरेत्की यांनी या हल्ल्याचा तीव्र शब्दांत निषेध नोंदवला. युद्धाच्या पाचव्या वर्षीही प्रशासनाकडून अशा गंभीर चुका घडणे दुर्दैवी आहे. वारंवार होणाऱ्या या निष्काळजीपणामुळे निष्पाप नागरिकांना आपले प्राण गमवावे लागत असून याप्रकरणी जबाबदार अधिकाऱ्यांवर कडक कारवाई केली जाईल, असे त्यांनी स्पष्ट केले.
सतत होणाऱ्या बॉम्बफेकीमुळे कीवमधील अर्थव्यवस्था पूर्णपणे कोलमडली असून सर्वसामान्य नागरिकांचे जनजीवन पूर्णपणे विस्कळीत झाले आहे. या जीवघेण्या हल्ल्यानंतर आता युक्रेन रशियाला काय प्रत्युत्तर देणार, याकडे जगाचे लक्ष लागले आहे.
