पुणे : रक्षाबंधनाच्या पवित्र सणादिवशी पुणे-नाशिक महामार्गावरून प्रवास करणाऱ्या एकाच कुटुंबातील बाप आणि त्यांच्या 14 वर्षांच्या मुलीचा भरधाव ट्रकखाली चिरडून जागीच मृत्यू झाला. या अपघातात गंभीर जखमी झालेल्या आईवर रुग्णालयात उपचार सुरू असून त्यांची प्रकृती अत्यंत नाजूक आहे.
मिळालेल्या माहितीनुसार, या अपघातात राजेंद्र भोर आणि त्यांची मुलगी मयूरी भोर (वय 14 )यांचा जागीच मृत्यू झाला आहे.तर आई गंभीर जखमी झाली आहे. अवसरी येथील रहिवासी असलेले राजेंद्र भोर हे पत्नी आणि मुलगी मयूरीसोबत दुचाकीने वासुलीकडे जात होते. महामार्गावरून प्रवास करत असताना चाकण परिसरात एका अनियंत्रित ट्रकने त्यांच्या दुचाकीला जोरदार धडक दिली. धडक एवढी भीषण होती की दुचाकी थेट ट्रकच्या चाकाखाली गेली.
या दुर्घटनेत राजेंद्र भोर आणि त्यांची मुलगी मयूरी यांचा ट्रकच्या चाकाखाली चिरडल्यामुळे जागीच दुर्दैवी मृत्यू झाला. अपघातात आई गंभीर जखमी झाल्याने त्यांना तात्काळ चाकण येथील स्थानिक रुग्णालयात दाखल करण्यात आले आहे. तेथे त्यांची मृत्यूशी झुंज सुरू आहे.
रक्षाबंधनाच्या सणाच्या दिवशीच भोर कुटुंबावर अचानक काळाने घाला घातल्याने अवसरी आणि वासुली परिसरात शोककळा पसरली आहे. घटनेची माहिती मिळताच स्थानिकांनी मदतकार्य सुरू केले आणि पोलिसांना पाचारण केले. पोलिसांनी घटनास्थळी पोहोचून पंचनामा केला असून, ट्रकचालकाविरुद्ध गुन्हा दाखल करून पुढील कायदेशीर तपास सुरू केला आहे.
