पुणे : गेल्या काही दिवसांपासून पुणे शहरात सध्या भटक्या कुत्र्यांचा त्रास प्रचंड वाढला आहे. गल्लीबोळातून फिरणारे नागरिक, खेळणारी लहान मुले आणि रात्रीच्या वेळी दुचाकीस्वारांवर होणाऱ्या हल्ल्यांमुळे नागरिक त्रस्त आहेत. कुत्र्यांची टोळकी आणि रात्रीच्या भुंकण्यामुळे लोकांची झोप उडाली आहे. अशा परिस्थितीत पुणे महानगरपालिकेने शहरात भटक्या कुत्र्यांची नवीन जनगणना करण्यासाठी 25 लाख रुपयांची निविदा प्रसिद्ध केली आहे. पालिकेच्या या निर्णयावर पुणेकरांनी तीव्र संताप व्यक्त केला आहे.
मिळालेल्या माहितीनुसार, महापालिकेत 32 नवीन गावांचा समावेश झाल्याने संपूर्ण शहराचा कानाकोपरा या मोहिमेत समाविष्ट केला जाईल. ही मोहीम वर्षभर चालणार असून, यासाठी ‘mahatenders.gov’ वर निविदा मागवण्यात आल्या आहेत. अर्ज करण्याची शेवटची तारीख 4 ऑगस्ट आहे. या कामासाठी एका खासगी संस्थेची निवड केली जाईल आणि प्रभागनिहाय कुत्र्यांचा मागोवा घेण्यासाठी विशेष मोबाईल ॲप्लिकेशनही विकसित केले जाणार आहे.
गेल्या काही वर्षांतील श्वानदंशाची आकडेवारी:
2022: 16,569 घटना
2023: 22,945 घटना
2024: 25,899 घटना
2025: 30,613 घटना
दर 5 वर्षांनी अशी जनगणना केली जाते. यापूर्वी 2018 आणि 2023 मध्ये कुत्र्यांची गणना झाली होती. 2023 च्या गणनेनुसार शहरात सुमारे 1,79,000 भटके कुत्रे होते आणि त्यावेळी या कामासाठी 13 लाख रुपयांचा खर्च आला होता.
नसबंदीची प्रक्रिया संथ गतीने सुरू असताना आणि श्वानदंशाच्या घटना 30,000 च्या पार गेल्या असताना, केवळ गणना करण्यावर 25 लाख रुपये उधळल्याने नागरिक संतप्त झाले आहेत. “फक्त कुत्रे मोजल्याने नागरिकांना कुत्रे चावण्याचे थांबणार आहे का? हा खर्च खरोखर कुत्र्यांची गणना करण्यासाठी आहे की ही मोहीम केवळ कागदावरच राहणार?” असा रोकडा सवाल आता पुणेकर विचारत आहेत.
