पुणे: पुण्यातील लोहगड किल्ल्यावर 18 जून रोजी घडलेल्या केतन अग्रवाल हत्या प्रकरणाच्या तपासादरम्यान मुख्य आरोपी सिया गोयलबाबत नवे दावे समोर येत आहेत. सोशल मीडियावर तिचा एक जुना व्हिडिओ व्हायरल होत असून, त्यानंतर तिच्या लाइफस्टाइलबाबत विविध चर्चा रंगल्या आहेत.
मिळालेल्या माहितीनुसार, व्हायरल होत असलेला हा व्हिडिओ डिसेंबर 2022 मधील असल्याचा दावा केला जात आहे. या व्हिडिओत सिया सिंगापूरमधील एका क्लबमध्ये पार्टी करताना, मद्यपान करताना आणि डान्स फ्लोअरवर नाचताना दिसत असल्याचे सांगितले जात आहे.
तपासादरम्यान सियाच्या राहणीमानाची आणि सवयींचीही चौकशी सुरू आहे. तपासाशी संबंधित माहितीनुसार, तिला महागड्या पार्ट्यांची आवड होती आणि ती ऐषआरामी जीवनशैली जगत होती, असे दावे समोर आले आहेत.
यापूर्वी केतनच्या आईने पोलिसांना दिलेल्या जबाबात सियाला मद्यपानाचे व्यसन असल्याचा आरोप केला होता. तसेच, पोलिस कोठडीत असताना तिने बिअरची मागणी केल्याचाही दावा यापूर्वी समोर आला होता. या पार्श्वभूमीवर व्हायरल व्हिडिओ आणि तिच्या कथित मद्यपानाच्या सवयींची माहिती तपासाचा भाग म्हणून पडताळली जात असल्याचे समोर आले आहे.
दरम्यान, केतन अग्रवाल हत्या प्रकरणात अटक करण्यात आलेले सिया गोयल आणि चेतन चौधरी यांची पोलीस कोठडीत चौकशी सुरू आहे. दोघांच्या मोबाईलमधील डिलीट करण्यात आलेला डेटा, कॉल रेकॉर्ड आणि इतर डिजिटल पुराव्यांची फॉरेन्सिक तपासणी केली जात असून, त्यातून आणखी महत्त्वाची माहिती समोर येण्याची शक्यता व्यक्त केली जात आहे.
