उरुळी कांचन, ता. 23 : जुनी कार खरेदी केल्यानंतर डेंटिंग-पेंटिंग करून देण्याच्या बहाण्याने कार ताब्यात घेतली आणि ती परस्पर दुसऱ्याला विकल्याचा प्रकार समोर आला आहे. या प्रकरणात 3 लाख 10 हजार रुपयांची फसवणूक केल्याप्रकरणी उरुळी कांचन पोलिस ठाण्यात एकाविरुद्ध गुन्हा दाखल करण्यात आला आहे.
आकाश मारुती चौधरी (रा. पेठ, ता. हवेली) असे गुन्हा दाखल झालेल्या व्यक्तीचे नाव आहे, याबाबत योगेश रामदास गोठे (वय 35, रा. बोरीऐंदी, ता. दौंड) यांनी याबाबत पोलिसांत फिर्याद दिली आहे.
पोलिसांनी दिलेल्या माहितीनुसार, योगेश गोठे हे 7 मे 2026 रोजी त्यांचा भाचा विजय सकट याच्यासोबत सोरतापवाडी येथील निलकंठ मोटर्समध्ये जुनी कार खरेदी करण्यासाठी गेले होते. तेथे आकाश चौधरी याने मारुती सुझुकी वॅगनआर (एमएच-14 GS-6940) ही कार दाखवली. कार पसंत पडल्यानंतर तिचा व्यवहार 3 लाख 25 हजार रुपयांना ठरल्याचे फिर्यादीत नमूद आहे.
त्यानंतर 17 जुलै रोजी आकाश चौधरीच्या माध्यमातून बारामती येथील ए.यू. स्मॉल फायनान्सकडून कारसाठी 3 लाख 10 हजार रुपयांचे कर्ज घेण्यात आले. कर्जाची प्रक्रिया पूर्ण झाल्यानंतर कार फिर्यादीच्या नावावर करण्यात आली. मात्र, कारचे डेंटिंग-पेंटिंगचे काम करून देण्याचे सांगून आकाश चौधरी याने कार स्वतःच्या ताब्यात ठेवली. कार परत मिळावी म्हणून फिर्यादीने वारंवार मागणी केली असता, “दुरुस्ती झाली नाही, आज देतो… उद्या देतो,” अशी कारणे सांगून कार देण्यास टाळाटाळ केल्याचा आरोप आहे.
दरम्यान, आकाश चौधरी याचा पेठ येथे शोध घेतला असता तो मिळून आला नाही. त्यानंतर चौधरी याने कार आपल्याला न देता परस्पर अन्य व्यक्तीला विकल्याचे लक्षात आल्याने आपली फसवणूक झाल्याचे फिर्यादीच्या लक्षात आले, असे तक्रारीत म्हटले आहे. या प्रकरणी उरुळी कांचन पोलिस ठाण्यात गुन्हा दाखल करण्यात आला आहे. या प्रकरणाचा तपास पोलीस हवालदार सोमनाथ चितारे करीत आहेत.
