डॉ. अशोक बालगुडे
पुणे: पुण्याच्या थंडीने अखेर आपले खरे रूप दाखवायला सुरुवात केली आहे. कालपर्यंत गुलाबी थंडीचा आनंद घेणारे पुणेकर आता स्वेटर, मफलर आणि कानटोप्यांच्या आश्रयाला गेले आहेत. पहाटे धुक्याची चादर, अंगाला झोंबणारे वारे आणि घसरता पारा यामुळे शहरात हुडहुडी भरली आहे. थंडीने अशी काही पकड घेतली आहे की, सकाळच्या फेरफटक्यालाही आता ‘गरम कपड्यांचे कवच’ घालूनच बाहेर पडावे लागत आहे!
एनडीए परिसरात शुक्रवारी (दि. १३) किमान तापमानाची नोंद ११.९ अंश सेल्सिअस झाली. गुरुवारी हाच पारा १२.६ अंशांवर होता. म्हणजे थंडीने एका दिवसातच आणखी जोर पकडला. माळीण येथे १२.६, हवेलीत १३.४, शिवाजीनगरमध्ये १४.३, पाषाणमध्ये १४.५ आणि पुरंदरमध्ये १४.९ अंश तापमान नोंदले गेले. हडपसरमध्ये १६.६, तर मगरपट्ट्यात १८.२ अंशांची नोंद झाली.
थंडीचा पारा खाली येताच रात्री आणि पहाटे ठिकठिकाणी शेकोट्या पेटू लागल्या आहेत. चहाच्या टपऱ्यांवर गर्दी वाढली असून, गप्पांचा विषयही एकच ‘आज किती थंडी आहे!’ मॉर्निंग वॉकला निघणाऱ्यांच्या अंगावर ट्रॅकसूटपेक्षा स्वेटर, मफलर आणि कानटोप्यांचेच वर्चस्व दिसू लागले आहे. गुलाबी थंडीचा आनंद घेणाऱ्यांनाही आता गारठ्याची जाणीव होऊ लागली आहे.
पुढील दोन दिवसांत गारठा आणखी वाढण्याचा अंदाज व्यक्त करण्यात आला आहे. त्यामुळे पहाटे आणि रात्री बाहेर पडताना उबदार कपडे वापरण्याचे आवाहन करण्यात आले आहे. लहान मुले आणि ज्येष्ठ नागरिकांनी विशेष काळजी घ्यावी, तसेच थंडीत तहान कमी लागली तरी पुरेसे पाणी प्यावे, असा सल्ला देण्यात आला आहे.
एकूणच, पुण्यात थंडीची एन्ट्री आता केवळ हवामानाच्या नोंदीपुरती राहिलेली नाही; तिचा मुक्काम घराघरांत, शेकोट्यांभोवती आणि चहाच्या कपांतही दिसू लागला आहे. उन्हाळ्यात उकाड्याला दोष देणारे पुणेकर आता थंडीच्या नावाने कुडकुडत आहेत. ऋतू बदलला की पुण्याच्या गप्पांचा विषयही बदलतो, हेच खरे!
