उरुळी कांचन, ता. 07 : भवरापूर (ता. हवेली) परिसरात दिवसेंदिवस बिबट्याचा वावर वाढू लागला आहे. यामुळे नागरिकांमध्ये भीतीचे वातावरण आहे. अशातच सोमवारी (ता. 06) एका शेतकर्‍याच्या एका वर्षाच्या गायीच्या वासरावर बिबट्याने हल्ला केला. यामुळे बिबट्याचा बंदोबस्त करावा, अशी मागणी होत आहे. परंतु, वन विभागाकडून बिबट्याला पकडण्यासाठी कोणतीच कार्यवाही होत नसल्याने शेतकऱ्यांकडून संताप व्यक्त होत आहे.
भवरापूर येथील शेतकरी दिगंबर यशवंत जगताप (रा. भाग्य उदय सोसायटी, भवरापूर) यांच्या गोठ्यात सोमवारी पहाटे तीन वाजण्याच्या सुमारास बिबट्याने शिरकाव केला. यावेळी गोठ्यात बांधलेल्या एका वर्षाच्या वासराचा बिबट्याने गळा घोटून शिकार केली. पहाटेच्या सुमारास जनावरांच्या ओरडण्याच्या आवाजाने घरचे जागे झाले, मात्र तोपर्यंत बिबट्याने वासराचा जीव घेतला होता.
विशेष म्हणजे, याच गोठ्यातून तीन महिन्यांपूर्वी बिबट्याने तीन शेळ्यांची शिकार केली होती. त्यावेळी वनविभागाचे अधिकारी गायकवाड यांनी घटनास्थळी येऊन पंचनामा केला होता. त्यावेळी जगताप कुटुंबियांनी आणि ग्रामस्थांनी परिसरात पिंजरा बसवण्याची आग्रही मागणी केली होती. मात्र, वनविभागाने याकडे दुर्लक्ष केल्याचा आरोप आता ग्रामस्थ करत आहेत.
