पुणे : महाराष्ट्र लोकसेवा आयोगाचे अध्यक्ष विवेक भीमनवार यांच्या राजीनाम्याच्या मागणीसह पेपरफुटी, रखडलेल्या नोकरभरती आणि आयोगाच्या कारभारातील कथित अनागोंदीविरोधात पुण्यात एमपीएससी विद्यार्थ्यांचे आंदोलन सुरू आहे. एस. एम. जोशी पुलाजवळ सुरू असलेल्या या आंदोलनाला शिवसेना नेते खासदार संजय राऊत यांनी रविवारी संध्याकाळी भेट दिली. यावेळी विद्यार्थ्यांनी जोरदार घोषणाबाजी करत राऊत यांचे स्वागत केले. विद्यार्थ्यांशी संवाद साधताना त्यांनी आंदोलनाला पाठिंबा देत मागे न हटण्याचे आवाहन केले.
“तरुणांनी बोलू नये, शिक्षित होऊ नये आणि आपल्या हक्कांसाठी आवाज उठवू नये, असे सत्ताधाऱ्यांना वाटते. पण हा महाराष्ट्र शिवाजी महाराजांचा, फुले-शाहू-आंबेडकरांचा आहे. अन्यायाविरोधात पेटून उठणे ही या मातीची शिकवण आहे,” असे राऊत म्हणाले. रोहित पवार हेही उद्याची पिढी वाचावी यासाठी विद्यार्थ्यांसोबत आंदोलनाला बसल्याचे त्यांनी सांगितले. “पुण्यातील हे आंदोलन महाराष्ट्राचे जंतर-मंतर आहे. मागे हटू नका. तुमच्या एकीने आयोगाचा अध्यक्ष नक्की हटवला जाईल आणि तुमच्या संघर्षाला यश मिळेल,” असा विश्वास त्यांनी व्यक्त केला.
सरकार विद्यार्थ्यांच्या आवाजाने घाबरले असूनही बहिरेपणाचे सोंग घेत असल्याचा आरोप राऊत यांनी केला. “शिक्षणमंत्री धर्मेंद्र प्रधान गेले, आता नंबर एमपीएससी अध्यक्ष भीमनवार यांचा आहे,” असे म्हणत त्यांनी सरकारवर टीका केली. आंदोलनात फूट पाडण्याचा प्रयत्न सरकारकडून झाल्याचा आरोप करत, सरकार मनाने प्रामाणिक असते तर विद्यार्थ्यांच्या मागण्या समजून घेतल्या असत्या, असेही ते म्हणाले. “जे सरकार शुद्ध पद्धतीने निवडणुका घेऊ शकत नाही, ते परीक्षा काय घेणार?” असा सवाल त्यांनी उपस्थित केला.
जंतर-मंतरवरील विद्यार्थ्यांच्या घोषणांचा उल्लेख करत राऊत यांनी मिश्किल टिप्पणीही केली. “मी देशाचा प्रधानमंत्री झालो तर घोषणा लिहिणाऱ्यांना पद्मश्री पुरस्कार दिला असता,” असे ते म्हणाले. देशात एकेकाळी “वडिलांची पँट फाटली तरी मुलगा मोदी-मोदी करतो आहे” अशी परिस्थिती होती, मात्र आता बदल घडत असल्याचा दावा त्यांनी केला. “मुलांना अंधभक्त बनवण्याचे कारखाने सरकारने चालवले आहेत. पण अंधभक्तीचा गांजा आणि चरस उतरवण्याचे काम आम्ही हाती घेतले आहे. हा महाराष्ट्र लढणाऱ्यांचा आहे, षंढांचा नाही,” असे म्हणत त्यांनी तरुणांनी आत्मविश्वास कायम ठेवून संघर्ष सुरू ठेवावा, असे आवाहन केले.
