पुणे : महाराष्ट्र शासनाची ‘मुख्यमंत्री माझी लाडकी बहीण योजना’ ही महिलांना आर्थिकदृष्ट्या स्वावलंबी बनवण्यासाठी अत्यंत महत्त्वाची ठरत आहे.सध्या अनेक महिलांच्या खात्यात सप्टेंबर महिन्याचा हप्ता जमा झालेला नाही. त्यातच ऑक्टोबर महिना संपायला अवघे काही दिवस शिल्लक असल्याने महिला वर्गात चिंतेचे वातावरण आहे.त्यामुळे आता दिवाळीनंतर पैसे मिळणार की प्रतीक्षाच करावी लागणार असा सवाल महिला वर्गाकडून उपस्थित होत आहे
लाभार्थी महिलांना सप्टेंबर आणि ऑक्टोबर या दोन्ही महिन्यांचे मिळून एकूण 3000 रुपये एकत्र मिळतील का, अशी चर्चा रंगू लागली आहे. दिवाळीचा सण जवळ आल्याने ही रक्कम मिळाल्यास महिलांना घरखर्च आणि खरेदीसाठी मोठा दिलासा मिळू शकतो.
. या योजनेद्वारे पात्र महिलांच्या बँक खात्यात दरमहा 1500 रुपयांची मदत थेट डीबीटीद्वारे जमा केली जाते. या लाभासाठी 21 ते 65 वर्षे वयोगटातील महिला पात्र असून, त्यांना इतर अटींची पूर्तता करणे अनिवार्य असते.
मात्र सप्टेंबर आणि ऑक्टोबर या दोन्ही महिन्यांचे हप्ते एकत्र देण्याबाबत राज्य सरकारकडून अद्याप कोणतीही अधिकृत घोषणा करण्यात आलेली नाही. आगामी मंत्रिमंडळ बैठकीत रखडलेल्या हप्त्यांबाबत निर्णय होण्याची शक्यता वर्तवली जात असली, तरी याबाबत शासनाचा अंतिम निर्णय काय असेल हे पाहणे महत्त्वाचे ठरेल.
या पार्श्वभूमीवर, लाभार्थी महिलांनी सोशल मीडियावर पसरणाऱ्या कोणत्याही अफवांवर किंवा अनधिकृत बातम्यांवर विश्वास ठेवू नये. हप्त्याबाबत केवळ शासनाच्या अधिकृत माहितीवरच भरवसा ठेवावा. तसेच, पैशांचे हस्तांतरण विनाअडथळा व्हावे यासाठी सर्व महिलांनी आपले बँक खाते सक्रिय ठेवून ई-केवायसी व इतर आवश्यक तपशील वेळेत अपडेट करून घेणे गरजेचे आहे.
