भिगवण, (पुणे) : जमिनीच्या वादातून एकाच कुटुंबातील सदस्यांना जिवे मारण्याचा प्रयत्न करत त्यांच्यावर कोयता, लोखंडी पाईप आणि गजाने हल्ला केल्याची धक्कादायक घटना समोर आली आहे. तर भांडण सोडवण्यासाठी आलेल्या महिलांना लाथाबुक्क्यांनी मारहाण करीत महिलेचा विनयभंग करून गळ्यातील सोन्याचे मंगळसूत्र जबरदस्तीने हिसकावून नेण्यात आल्याची घटना घडली. अकोले (ता. इंदापूर) ग्रामपंचायत हद्दीतील शेत जमीन गट नंबर ४१४ येथे बुधवारी (ता. 27) सकाळी सव्वा नऊ वाजण्याच्या सुमारास ही घटना घडली. याप्रकरणी पवारवस्ती (पोंधवडी) येथील 7 जणांच्या विरुद्ध विविध गंभीर कलमांन्वये गुन्हा दाखल करण्यात आला आहे.
याबाबत सतीश रामदास आवाड (वय 40, धंदा-शेती, रा. वायसेवाडी, ता. इंदापूर) यांनी याप्रकरणी भिगवण पोलीस ठाण्यात फिर्याद दिली आहे. त्यानुसार पोलिसांनी लखन राजेंद्र दराडे, गणेश वामन दराडे, राजेंद्र श्रीहर दराडे, संजय श्रीहर दराडे, शुभम बाळासो दराडे, विलास आत्माराम दराडे, सार्थक संजय दराडे (सर्व रा. पवारवस्ती, पोंधवडी, इंदापूर, जि. पुणे) असे गुन्हा दाखल करण्यात आलेल्यांची नावे आहेत.
पोलिसांनी दिलेल्या माहितीनुसार, सतीश आवाड बुधवारी सकाळी सव्वा नऊ वाजण्याच्या सुमारास कुटुंबासहित शेत जमीन गट नंबर ४१४ मधील आपल्या मालकीच्या शेतात उन्हाळी मशागतीचे काम करत होते. ते शेतातील दगड-धोंडे गोळा करून बाहेर टाकत असतानाच, वरील आरोपी हातामध्ये धारदार कोयते, लोखंडी गज, लोखंडी पाईप आणि लाकडी काठ्या घेऊन मोटारसायकलवरून शेतात घुसले.
या आरोपींनी आवाड कुटुंबाला अश्लील शिवीगाळ सुरू केली. काही समजण्याच्या आतच, आरोपींनी सतीश आवाड यांच्या डोक्यात धारदार कोयत्याने थेट प्रहार केला. यावेळी सतीश यांच्या डोक्यातून रक्त येऊ लागले व ते जमिनीवर कोसळले. सतीश यांना वाचवण्यासाठी त्यांचे वडील आणि भाऊ धावले असता, आरोपींनी त्यांनाही जमिनीवर पाडून लोखंडी गजाने, लाकडी काठ्यांनी आणि दगडांनी बेदम मारहाण केली.
फिर्यादी सतीश यांची पत्नी या पतीला वाचवण्यासाठी पुढे आले असता, आरोपींनी त्यांचा विनयभंग केला. तसेच भावजय ही मदतीसाठी ओरडत असताना तिला लाथाबुक्क्यांनी अमानुष मारहाण करण्यात आली आणि तिच्या गळ्यातील सोन्याचे मंगळसूत्र जबरदस्तीने हिसकावून आरोपी घटनास्थळावरून पसार झाले असल्याचे फिर्यादीत म्हटले आहे.
दरम्यान, याबाबत सतीश आवाड यांनी दिलेल्या तक्रारीवरून वरील आरोपींवर विविध कलमान्वये भिगवण पोलीस ठाण्यात गुन्हा दाखल करण्यात आला आहे. तपास पोलीस उपनिरीक्षक खाडे करीत आहेत.
