पुणे: जुन्नर तालुक्यातील शिरोली खुर्द येथे राज्य उत्पादन शुल्क विभागाने बनावट विदेशी मद्य निर्मिती करणाऱ्या रॅकेटवर मोठी कारवाई करत तब्बल 4 लाख 54 हजार रुपयांचा मुद्देमाल जप्त केला आहे. या कारवाईत 329 बनावट विदेशी मद्याच्या बाटल्या, बनावट बुचे, कॅप्स, लेबल्स, पॅकिंग साहित्य आणि एक मोटार जप्त करण्यात आली. याप्रकरणी गोविंद शंकर जाधव (रा. निरगुडे, ता. जुन्नर) आणि रवींद्र शामराव माळी (रा. म्हाळुंगे पडवळ, ता. आंबेगाव) या दोघांना अटक करण्यात आली आहे.
उत्पादन शुल्क विभागाला बनावट विदेशी मद्य तयार करून विक्री केली जात असल्याची गोपनीय माहिती मिळाली होती. त्यानुसार 30 मे 2026 रोजी नारायणगाव पथकाने जुन्नर-गणेशखिंड मार्गावर सापळा रचला. वाहन तपासणीदरम्यान गोविंद जाधव याच्या कारमधून चंदिगड निर्मितीचे लेबल लावलेल्या बनावट विदेशी मद्याचा साठा आढळून आला.
चौकशीदरम्यान शिरोली खुर्द येथील एका घरात मोठ्या प्रमाणात बनावट मद्य तयार केले जात असल्याचे उघड झाले. पोलिसांनी तेथे छापा टाकला असता इम्पिरियल ब्लू, रॉयल स्टॅग आणि यूके नं. 1 या नामांकित ब्रँडच्या नावाने तयार केलेले बनावट मद्य, रिकाम्या बाटल्या, बनावट बुचे, कॅप्स, लेबल्स आणि पॅकिंग साहित्य जप्त करण्यात आले.
प्राथमिक तपासात गोविंद जाधव हा अहमदनगर परिसरातून बनावट मद्य आणत असल्याचे समोर आले आहे. तसेच भंगार व्यावसायिकांकडून रिकाम्या बाटल्या खरेदी करून त्यामध्ये मद्य भरले जात होते. त्यानंतर बनावट लेबल आणि बुचे लावून हे मद्य विक्रीसाठी बाजारात पाठवले जात असल्याची माहिती तपासात पुढे आली आहे.
हे बनावट मद्य नेमके कोणत्या भागात विकले जात होते आणि या रॅकेटमध्ये आणखी कोणाचा सहभाग आहे, याचा सखोल तपास सुरू आहे. राज्य उत्पादन शुल्क विभागाच्या पथकाने ही कारवाई केली असून पुढील तपास सुरू आहे.
