पुणे: पुणे आणि पिंपरी-चिंचवड परिसरात विषारी दारू प्रकरणामुळे संतापाचे वातावरण निर्माण झाले आहे. या घटनेत आतापर्यंत 18 जणांचा मृत्यू झाला असून अनेक कुटुंबांवर दुःखाचा डोंगर कोसळला आहे. या प्रकरणी पोलिसांनी अनेक आरोपींना अटक केली असून संपूर्ण तपास सीआयडीकडे सोपवण्यात आला आहे. दरम्यान, ज्या ठिकाणाहून विषारी दारूची विक्री होत होती, त्या फुगेवाडीतील दारू अड्ड्यावर प्रशासनाने मोठी कारवाई सुरू केली आहे.
महापालिकेच्या तपासणीत संबंधित बांधकाम अनधिकृत असल्याचे निष्पन्न झाले. त्यानंतर संबंधितांना जागा स्वतःहून हटविण्याची नोटीस देण्यात आली होती. प्रशासनाने 24 तासांच्या आत अतिक्रमण हटवण्याचे आदेश दिले होते. मात्र आदेशानंतरही कारवाई न झाल्याने महापालिकेने थेट पाडकाम सुरू केले.
फुगेवाडी परिसरातील रस्ते अत्यंत अरुंद असल्याने जेसीबी, पोकलेन यांसारखी मोठी यंत्रे घटनास्थळी पोहोचू शकली नाहीत. त्यामुळे कर्मचाऱ्यांना हातोडे आणि हँड ब्रेकरच्या साहाय्याने पाडकाम करावे लागत आहे. गेल्या अनेक तासांपासून ही कारवाई सुरू असून अड्डा पूर्णपणे हटवण्यासाठी प्रशासन प्रयत्न करत आहे.
विषारी दारूमुळे झालेल्या मृत्यूंनंतर स्थानिक नागरिकांनीही संताप व्यक्त केला आहे. अनेक दिवसांपासून या भागात बेकायदेशीर दारू विक्री सुरू असल्याचा आरोप नागरिकांनी केला आहे. वारंवार तक्रारी करूनही प्रभावी कारवाई झाली नसल्याचेही स्थानिकांचे म्हणणे आहे.
या प्रकरणामुळे राज्यभर खळबळ उडाली असून पोलिस, महापालिका आणि इतर यंत्रणांवरही प्रश्नचिन्ह उपस्थित झाले आहे. सध्या सीआयडीकडून संपूर्ण साखळीचा तपास सुरू असून विषारी दारू तयार करणे, पुरवठा करणे आणि विक्री करणे यामध्ये सहभागी असलेल्या सर्वांवर कठोर कारवाई केली जात आहे.
दरम्यान, फुगेवाडीतील हा दारू अड्डा पूर्णपणे जमीनदोस्त करण्याचे काम सुरू असून प्रशासनाकडून पुढील कारवाईही वेगाने केली जात आहे.
