राहुलकुमार अवचट
यवत : यवत पोलीस स्टेशन हद्दीत भुलेश्वर रस्त्यावर दि.२३ जुन रोजी दुपारी २.३० च्या सुमारास भुलेश्वर फाटा ते भुलेश्वर मंदिराकडे जाणाऱ्या रस्त्यावर अंदाजे ५०० मीटर अंतरावर एक व्यक्ती विनापरवाना गावठी पिस्टल बाळगत असल्याची माहिती मिळाली. या माहितीच्या आधारे यवत पोलिसांनी तात्काळ घटनास्थळी जाऊन पाहणी केली असता आदित्य सर्जेराव सांगळे (वय २१ वर्षे रा. दत्तनगर, पाटस ता. दौंड जि. पुणे) हा विनापरवाना व बेकायदेशीररित्या एक गावठी पिस्टल जवळ बाळगताना मिळून आला.
त्याने जिल्हाधिकारी पुणे यांच्या दि. १३ जून ते २६ जून पर्यंत शस्त्रे, तलवारी, बंदुका आदि वस्तू जवळ बाळगण्यास मनाई या आदेशाचे उल्लंघन केले असून सदर गावठी पिस्टल व एक जिवंत काडतुस जप्त करण्यात आले आहे. याप्रकरणी संदिप सुरेश देवकर यांनी दिलेल्या फिर्यादीवरून आरोपी आदित्य सर्जेराव सांगळे याच्याविरुद्ध भारतीय शस्त्र अधिनियम १९५९ चे कलम ३, २५ तसेच महाराष्ट्र पोलीस अधिनियम १९५१ चे कलम ३७(१), (३) सह १३५ प्रमाणे यवत पोलीस स्टेशन येथे गुन्हा दाखल करण्यात आला आहे.
सदर गुन्ह्याचा पुढील तपास यवत पोलीस स्टेशनचे पोलीस उपनिरीक्षक मारोती मेतलवाड हे करत आहेत. सदरची कारवाई पुणे ग्रामीणचे पोलीस अधीक्षक संदिपसिंह गिल, बारामती विभागाचे अप्पर पोलीस अधीक्षक गणेश बिरादार, दौंड उपविभागीय पोलीस अधिकारी बापुराव दडस यांच्या मार्गदर्शनाखाली यवत पोलीस स्टेशनचे पोलीस निरीक्षक संतोष तासगांवकर, पोलीस उपनिरीक्षक मारोती मेतलवाड, पोलिस हवालदार रॉकी देवकाते, संदिप देवकर, गणेश कर्चे, महेंद्र चांदणे, धिरज जाधव, मारुती बाराते, अमोल भुजबळ, सचिन गुंड, मोहन भानवसे यांच्या पथकाने केली.
यवत व यवत पोलिस स्टेशन हद्दीतील सर्व ठिकाणी यवत पोलिसांकडून अवैध शस्त्र बाळगणाऱ्यांविरुद्ध यापुढेही कठोर कारवाई सुरू राहणार आहे.
-संतोष तासगावकर (पोलिस निरीक्षक, यवत पोलीस स्टेशन)
