आदित्य बोराटे
इंदापूर: जमिनीच्या व्यवहारात फसवणूक केल्याचा आरोप, जीवे मारण्याची धमकी, विनयभंग तसेच अल्पवयीन मुलीशी गैरवर्तन केल्याच्या फिर्यादीवरून इंदापूर पोलिस ठाण्यात तिघांविरुद्ध भारतीय न्याय संहिता (बीएनएस), पोक्सो कायदा आणि अनुसूचित जाती-जमाती (अत्याचार प्रतिबंधक) कायद्यान्वये गंभीर गुन्हा दाखल करण्यात आला आहे.
या प्रकरणी सुभाष संभाजी डरंगे, शिवाजी दशरथ जगताप आणि दशरथ नामदेव आसबे (रा. बाबुळगाव, ता. इंदापूर) यांच्याविरुद्ध गुन्हा दाखल करण्यात आला आहे. इंदापूर पोलिस ठाण्यात गुन्हा रजिस्टर क्रमांक ४५४/२०२६ नुसार २७ जुलै रोजी रात्री गुन्हा दाखल झाला असून, तपास उपविभागीय पोलिस अधिकारी (डीवायएसपी) चैतन्य कदम यांच्याकडे सोपविण्यात आला आहे.
फिर्यादीनुसार, आरोपींनी मार्च २०२६ मध्ये फिर्यादी कुटुंबाशी जमिनीचा व्यवहार करताना बनावट कागदपत्रांचा वापर करून फसवणूक केल्याचा आरोप आहे. संबंधित जमिनीचा मालकी हक्क नसतानाही जमीन विकल्याचे सांगून लाखो रुपयांची रक्कम घेतल्याचे फिर्यादीत नमूद करण्यात आले आहे. उर्वरित रकमेची मागणी केल्यानंतर आरोपींकडून जीवे मारण्याची धमकी दिल्याचाही आरोप करण्यात आला आहे.
तसेच ८ जुलै रोजी फिर्यादीचे पती व मुलगा बाहेर गेल्यानंतर आरोपी घरी आले. त्यावेळी फिर्यादीच्या अल्पवयीन मुलीशी वाद घालून तिचा हात धरत विनयभंग आणि गैरवर्तन केल्याचा आरोपही फिर्यादीत करण्यात आला असून, या प्रकरणात पोक्सो कायद्यांतर्गत गुन्हा देखील दाखल करण्यात आला आहे.
भारतीय न्याय संहितेच्या कलम ३१८(४), ७४, ३५१(२), ३(५) तसेच पोक्सो कायद्याच्या कलम ८ व १२ आणि अनुसूचित जाती-जमाती (अत्याचार प्रतिबंधक) कायद्याच्या कलम ३(१)(r), ३(१)(s), ३(२)(va) व ३(१)(w)(i) अन्वये गुन्हा दाखल केला आहे.
