पुणे: पुण्यातील वाकड पोलीस ठाण्याच्या हद्दीतील ताथवडे परिसरात एक अत्यंत धक्कादायक घटना उघडकीस आली आहे. एका घरात आई आणि तिच्या दोन मुलांचे मृतदेह आढळल्याने संपूर्ण परिसरात खळबळ उडाली आहे. या घटनेमुळे नागरिकांमध्ये हळहळ व्यक्त केली जात असून पोलिसांकडून सखोल तपास सुरू करण्यात आला आहे.
मिळालेल्या प्राथमिक माहितीनुसार, कल्पना बिपीन सूर्यवंशी (वय 35), शुभश्री बिपीन सूर्यवंशी (वय 17) आणि दादू बिपीन सूर्यवंशी (वय 10) अशी मृतांची नावे आहेत. हे तिघेही मायलेक असल्याचे समोर आले आहे.
स्थानिकांकडून मिळालेल्या माहितीनुसार, आर्थिक विवंचनेमुळे कल्पना सूर्यवंशी यांनी हे टोकाचे पाऊल उचलल्याचा संशय व्यक्त केला जात आहे. प्राथमिक अंदाजानुसार, त्यांनी विषारी पदार्थाचे सेवन केले असावे. तसेच संबंधित पदार्थ मुलांनाही दिल्यानंतर स्वतःही त्याचे सेवन केल्याची शक्यता व्यक्त करण्यात येत आहे.
घटनेची माहिती मिळताच वाकड पोलिसांनी घटनास्थळी धाव घेतली. पोलिसांनी पंचनामा करून मृतदेह शवविच्छेदनासाठी पाठवले आहेत. नेमका मृत्यू कशामुळे झाला, याबाबतचा अंतिम निष्कर्ष शवविच्छेदन अहवाल आणि फॉरेन्सिक तपासानंतरच स्पष्ट होणार आहे.
सध्या पोलिसांकडून कुटुंबाची आर्थिक परिस्थिती, कौटुंबिक पार्श्वभूमी तसेच इतर संभाव्य कारणांचा तपास केला जात असून, या घटनेमागील नेमके कारण शोधण्याचे काम सुरू आहे. प्राथमिक स्वरूपात आत्महत्येचा संशय व्यक्त केला जात असला तरी सर्व बाजूंनी तपास सुरू असल्याचे पोलिसांनी सांगितले आहे.
