पुणे: पुण्यातील सिंहगड रस्ता परिसरातील वडगाव बुद्रुक येथे भररस्त्यात वाईन्स शॉपच्या कॅशिअरला लक्ष्य करत तब्बल ८ लाख रुपयांहून अधिक रकमेची धाडसी लूट झाल्याची घटना समोर आली आहे. चार अज्ञात दरोडेखोरांनी कॅशिअरच्या डोळ्यात अज्ञात स्प्रे मारून त्यांच्याकडील रोकड आणि दुचाकी लुटून पलायन केल्याने परिसरात खळबळ उडाली आहे. या प्रकरणी नऱ्हे पोलीस ठाण्यात गुन्हा दाखल करण्यात आला असून आरोपींचा शोध सुरू आहे.
याप्रकरणी हौसकुमार प्रकाश इंगळे (वय ४२, रा. नऱ्हे) यांनी पोलिसांकडे फिर्याद दिली आहे. ते नऱ्हे येथील ‘डीएसपी वाईन्स’मध्ये कॅशिअर म्हणून कार्यरत आहेत. रविवारी रात्री सुमारे १०.५५ वाजता दुकान बंद केल्यानंतर त्यांनी दिवसभराच्या विक्रीतून जमा झालेली ७ लाख ७६ हजार ४८० रुपयांची रोकड पांढऱ्या रंगाच्या पिशवीत ठेवून ती आपल्या होंडा ॲक्टिव्हाच्या डिकीत ठेवली होती. ही रक्कम दुकानमालकांकडे जमा करण्यासाठी ते डांगे चौकाच्या दिशेने निघाले होते.
इंगळे हे वडगाव बुद्रुक येथील प्रयेजा सिटीजवळील सर्व्हिस रोडवरून वारजेच्या दिशेने जात असताना दोन मोटारसायकलींवर आलेल्या चार अज्ञात व्यक्तींनी त्यांची दुचाकी अडवली. काही क्षणांतच आरोपींनी त्यांच्या डोळ्यात अज्ञात स्प्रे फवारला. अचानक झालेल्या हल्ल्यामुळे इंगळे यांना काहीच दिसेनासे झाले आणि त्यांची प्रतिकार करण्याची क्षमता कमी झाली.
याच संधीचा फायदा घेत आरोपींनी इंगळे यांना धमकावत त्यांच्या ताब्यातील होंडा ॲक्टिव्हा मोपेडसह त्यामध्ये ठेवलेली रोकड लुटून घटनास्थळावरून पलायन केले. लुटलेल्या मुद्देमालामध्ये ७ लाख ७६ हजार ४८० रुपयांची रोकड आणि सुमारे ३० हजार रुपये किमतीची दुचाकी असा एकूण ८ लाख ६ हजार ४८० रुपयांचा ऐवज आहे.
घटनेची माहिती मिळताच नऱ्हे पोलिसांनी घटनास्थळी धाव घेत पंचनामा केला. परिसरातील सीसीटीव्ही फुटेज आणि इतर तांत्रिक पुराव्यांच्या आधारे आरोपींचा शोध सुरू असून या धाडसी दरोड्यामागे कोणाचे नियोजन होते का, याचाही तपास पोलीस करत आहेत.
