पुणे: पुणे-सोलापूर राष्ट्रीय महामार्गावर वाढत्या वाहतुकीमुळे प्रवाशांसाठी दिलासादायक निर्णय घेण्यात आला आहे. भारतीय राष्ट्रीय महामार्ग प्राधिकरणाने सध्या चौपदरी असलेल्या पुणे-सोलापूर राष्ट्रीय महामार्ग (NH-65) चे सहापदरी आणि प्रवेश-नियंत्रित द्रुतगती महामार्गात रूपांतर करण्याची प्रक्रिया सुरू केली आहे. या प्रकल्पामुळे भविष्यात प्रवास अधिक वेगवान, सुरक्षित आणि सुरळीत होण्याची अपेक्षा व्यक्त केली जात आहे.
या महत्त्वाकांक्षी प्रकल्पासाठी सविस्तर प्रकल्प अहवाल (DPR) आणि व्यवहार्यता अभ्यास तयार करण्यात येणार असून, त्यासाठी सल्लागार कंपनीची नियुक्ती करण्यासाठी NHAI ने निविदा मागवल्या आहेत. अभ्यासानंतर महामार्गाचे अंतिम स्वरूप आणि कामाचा आराखडा निश्चित केला जाईल.
पुणे-सोलापूर राष्ट्रीय महामार्ग हा महाराष्ट्रातील सर्वाधिक वर्दळीच्या मार्गांपैकी एक मानला जातो. हा मार्ग पुढे कर्नाटक, तेलंगणा आणि आंध्र प्रदेश या राज्यांना जोडत असल्याने मालवाहतूक आणि प्रवासी वाहतुकीसाठी अत्यंत महत्त्वाचा आहे. सुमारे २५० ते २६५ किलोमीटर लांबीच्या या महामार्गावरून सध्या दररोज ५० हजारांहून अधिक वाहने धावतात. मात्र, चौपदरी महामार्गाची क्षमता सुमारे ४० हजार वाहनांपर्यंत असल्याने वारंवार वाहतूक कोंडी होत आहे.
प्रस्तावित सहापदरी प्रवेश-नियंत्रित महामार्गाची संभाव्य लांबी सुमारे २१५ किलोमीटर असेल. हा प्रकल्प पूर्ण झाल्यानंतर पुणे ते सोलापूर प्रवास अधिक जलद होणार असून, विशेषतः यवत ते सोलापूर हा प्रवास सध्याच्या सुमारे ३ तास १५ मिनिटांऐवजी केवळ २ तास १० मिनिटांत पूर्ण होण्याची शक्यता आहे. त्यामुळे प्रवासाचा वेळ कमी होण्यासोबतच इंधनाची बचत आणि अपघातांचे प्रमाण कमी होण्यासही मदत होईल.
NHAI पुणे विभागाचे प्रकल्प संचालक सचिन गौतम यांनी दिलेल्या माहितीनुसार, सल्लागार नियुक्तीसाठी ८ सप्टेंबर रोजी निविदा उघडण्यात येतील. मार्च-एप्रिल २०२७ पर्यंत सविस्तर प्रकल्प अहवाल आणि व्यवहार्यता अभ्यास पूर्ण करण्याचे नियोजन आहे. त्यानंतर आवश्यक प्रशासकीय मंजुरीनंतर प्रत्यक्ष बांधकामाला सुरुवात होईल. पुढील चार ते पाच वर्षांत हा सहापदरी द्रुतगती महामार्ग पूर्ण होऊन प्रवाशांच्या सेवेत दाखल होईल, असा अंदाज व्यक्त करण्यात आला आहे.
