पुणे: पुण्याला देशातील आघाडीच्या तंत्रज्ञान शहरांच्या रांगेत उभे करण्याच्या दिशेने महत्त्वाचे पाऊल उचलण्यात आले आहे. बंगळुरू आणि हैदराबादच्या धर्तीवर पुण्याचा ‘ग्रोथ अँड इनोव्हेशन हब’ म्हणून विकास करण्याचा निर्णय राज्य सरकारने घेतला आहे. पुणे महानगर प्रदेश विकास प्राधिकरण (PMRDA) यांच्या माध्यमातून हा महत्त्वाकांक्षी प्रकल्प राबवला जाणार असून, राज्य शासनाने त्याची ‘हाय इम्पॅक्ट इनिशिएटिव्ह’ अर्थात समाज आणि अर्थव्यवस्थेवर दीर्घकालीन परिणाम करणारा प्रकल्प म्हणून निवड केली आहे.
या प्रकल्पाच्या आराखड्यावर सविस्तर चर्चा करण्यासाठी 15 जुलै रोजी पीएमआरडीएमध्ये विविध विभागांची बैठक पार पडली. या बैठकीला पुणे आणि पिंपरी-चिंचवड महापालिका, पीएमआरडीए तसेच उद्योग विभागातील वरिष्ठ अधिकारी उपस्थित होते. आगामी काळात या बैठकीत झालेल्या चर्चेनुसार प्रकल्पाच्या अंमलबजावणीला गती दिली जाणार आहे.
पुणे इनोव्हेशन हब अंतर्गत वाहतूक कोंडी, पायाभूत सुविधांची कमतरता आणि भविष्यातील विकासाच्या गरजा लक्षात घेऊन सर्वसमावेशक मास्टर प्लॅन तयार करण्यात येणार आहे. यासाठी सल्लागार कंपनीची नियुक्ती करण्यात आली असून, आवश्यक जागांचा अभ्यास, भविष्यात निर्माण होणाऱ्या रोजगाराच्या संधींचे नियोजन आणि स्वतंत्र विकास आराखडा तयार करण्याचे काम सुरू झाले आहे.
या महत्त्वाकांक्षी प्रकल्पाच्या नियोजनासाठी उद्योग विभागाचे प्रधान सचिव डॉ. पी. अनबलगन यांच्या मार्गदर्शनाखाली विविध विभागांमध्ये समन्वय साधला जाणार आहे. प्रकल्पाच्या प्रभावी अंमलबजावणीसाठी स्वतंत्र नोडल अधिकाऱ्याचीही नियुक्ती करण्यात आली आहे.
राज्य सरकारचा उद्देश पुण्याला केवळ आयटी शहर म्हणून नव्हे, तर जागतिक स्तरावरील इनोव्हेशन आणि तंत्रज्ञान केंद्र म्हणून विकसित करण्याचा आहे. त्यासाठी ‘ब्रँड पुणे’ची निर्मिती केली जाणार असून, देश-विदेशातील आघाडीच्या तंत्रज्ञान कंपन्यांना आकर्षित करण्यासाठी विशेष प्रयत्न केले जातील. याशिवाय बंगळुरूच्या धर्तीवर मोठ्या प्रमाणात टेक समिटचे आयोजन करण्याचाही प्रस्ताव आहे.
या उपक्रमामुळे पुण्यात गुंतवणूक वाढणे, नव्या उद्योगांना चालना मिळणे, उच्च कौशल्याधारित रोजगाराच्या संधी निर्माण होणे आणि शहराचा जागतिक तंत्रज्ञान नकाशावरील दर्जा अधिक मजबूत होण्याची अपेक्षा व्यक्त केली जात आहे.
