अक्षय टेमगिरे
रांजणगाव गणपती : केंदुर (ता. शिरुर) येथे एका युवकाचा प्रेमविवाह झाल्यानंतर त्याने पत्नीला दिलेल्या त्रासाने पत्नीने प्रेम विवाहानंतर चारच महिन्यात गळफास घेऊन आत्महत्या (४ सप्टेंबर) केल्याची धक्कादायक घटना घडली होती. याप्रकरणी शिक्रापूर पोलीस स्टेशन येथे विशाल बबन साकोरे याच्या विरुद्ध आत्महत्येस प्रवृत्त केल्याबाबत गुन्हा दाखल करण्यात आला आहे.
अधिक माहिती अशी की, केंदूर ता. शिरुर येथील पाचवड वस्ती येथे राहणाऱ्या विशाल साकोरे याचा साक्षी दौंडकर सोबत मे २०२४ मध्ये प्रेमविवाह झाला होता. त्यांनतर विशाल वारंवार साक्षीच्या वडिलांना कामासाठी पैसे मागत होता, तसेच घरातील वादातून साक्षीला मारहाणही करत होता. वारंवार होणाऱ्या त्रासाला कंटाळून साक्षी साकोरे हिने ४ सप्टेंबर २०२४ रोजी गळफास घेऊन आत्महत्या केली होती.
सदर घटनेत नवविवाहिता साक्षी विशाल साकोरे (वय २२ वर्षे रा. पाचवड केंदूर ता. शिरुर जि. पुणे) हिचा ४ सप्टेबर २०२४ रोजी मृत्यू झाला होता. याबाबत साक्षीचे वडील बाळासाहेब दगडू दौंडकर (वय ५१ वर्षे रा. कन्हेरसर ता. खेड जि. पुणे) यांनी शिक्रापूर पोलीस स्टेशन येथे फिर्याद दिली. त्यानंतर पोलिसांनी काल ९ सप्टेंबर रोजी विवाहितेचा पती विशाल बबन साकोरे (रा. पाचवड केंदूर ता. शिरुर जि. पुणे) याच्याविरुद्ध गुन्हा दाखल केला. पुढील तपास पोलीस निरीक्षक दिपरतन गायकवाड यांच्या मार्गदर्शनाखाली पोलीस उपनिरीक्षक सोमनाथ कचरे हे करत आहे.
