राहुलकुमार अवचट
यवत : पोलीस असल्याच्या बहाण्याने चार अनोळखी व्यक्तींना ट्रकचालकाला ५० हजार रूपयांचा गंडा घातल्याचा प्रकार पुणे-सोलापूर राष्ट्रीय महामार्गावर यवत हद्दीत घडला. याबाबत मिळालेल्या अधिक माहितीनुसार, पुणे-सोलापूर राष्ट्रीय महामार्गावर यवत गावच्या हद्दीत असलेल्या शेरू ढाब्यासमोर ट्रक (एम.एच. १२ एल.टी. ३१९२) उभा होता.
या वेळी पांढऱ्या रंगाच्या ब्रिझा कारमधून (क्र. एम. एच. १२ एन. बी. ०९८२) चार अनोळखी व्यक्ती तेथे आल्या. त्यावेळी ट्रकचालक ज्ञानेश्वर जालिंदर वाघमारे तेथे थांबले होते. त्याच्याजवळ येऊन पोलीस असल्याचे सांगून, त्याला मारहाण करून, त्याच्याजवळ असलेले ५० हजार रूपये जबरदस्तीने घेऊन ते चौघे फरार झाले.
याबाबत ट्रकमालक साधु सोपान थोरात यांनी २३ नोव्हेंबर रोजी चार अज्ञात व्यक्तींविरोधात यवत पोलीस स्टेशन येथे फिर्याद दिली आहे. याबाबत पुढील तपास यवत पोलीस स्टेशनचे पोलीस निरीक्षक हेमंत शेडगे यांच्या मार्गदर्शनाखाली सहाय्यक पोलीस निरीक्षक शेख करत आहेत.
