उरुळी कांचन,(पुणे) : पुणे-सोलापूर महामार्गावरील कोरेगाव मूळ (ता. हवेली) येथील एका नामांकित नर्सरीमध्ये काम करणाऱ्या कामगाराच्या 14 वर्षीय अल्पवयीन मुलाने अज्ञात कारणावरून गळफास घेऊन आत्महत्या केल्याची घटना घडली आहे. रविवारी (ता. 02) सायंकाळी सात वाजण्याच्या सुमारास ही घटना घडली.
सैतान भगत आदिवासी (वय -14, रा. इनामदारवस्ती, कोरेगाव मूळ, ता. हवेली मूळ रा, ललितपूर, ता. जि. ललितपूर, राज्य उत्तरप्रदेश) असे आत्महत्या केलेल्या मुलाचे नाव आहे.
मिळालेल्या माहितीनुसार, मृत मुलाचे कुटुंब हे कोरेगाव मूळ येथील इनामदार वस्ती येथील अथश्री नर्सरीमध्ये मजुरीचे काम करते. नेहमीप्रमाणे सायंकाळी कुटुंबातील सदस्य आणि इतर कामगार कामात व्यस्त असताना, सैतान याने राहत्या ठिकाणी अज्ञात कारणावरून गळफास घेतला. काही वेळानंतर ही घटना निदर्शनास येताच नातेवाईक व स्थानिक नागरिकांनी त्याला खाली उतरवून उपचारासाठी हलवले, मात्र त्याचा उपचारापूर्वीच मृत्यू झाला होता. अवघ्या 14 वर्षांच्या मुलाने ऐन वयात आत्महत्या का केली, याचे नेमके कारण अद्याप समोर आलेले नाही.
दरम्यान, घटनेची बातमी मिळताच उरुळी कांचन पोलिसांनी घटनास्थळी धाव घेऊन घटनेचा पंचनामा केला. याप्रकरणी उरुळी कांचन पोलीस ठाण्यात खबर देण्यात आली असून, अधिक तपास उरुळी कांचन पोलीस करत आहेत.
