राहुलकुमार अवचट
यवत: यवत पोलिसांची अवैध दारू व्यवसाय विरोधात धडक कारवाई करत एकाच दिवशी ०६ गुन्हे दाखल करण्यात आले असून यावेळी एकूण ८५,७१० हजार रूपयांचा मुद्देमाल हस्तगत करण्यात आला आहे. दि. ०२ ऑगस्ट रोजी नांदूर, यवत, कानगाव व डुबेवाडी परिसरात अवैध दारू विक्री तसेच गावठी हातभट्टी दारूची निर्मिती करणाऱ्या व्यक्ती विरोधात धडक कारवाई करण्यात आली. यावेळी महाराष्ट्र दारूबंदी अधिनियमांतर्गत एकूण ०६ गुन्हे दाखल करण्यात आले.
या कारवाईमध्ये नांदूर येथील आरोपी धरता रामानंद गुडदावत याच्याकडून ३१५ लिटर गावठी हातभट्टी, यवत येथील हॉटेल कोल्हापूर तडका परिसरातून आरोपी शिवाजी शहाजी भोसले याच्याकडून विविध ब्रँडच्या देशी व विदेशी मद्याच्या बाटल्या, कानगाव येथील आरोपी सत्यजित रविंद्र कांबळे याच्याकडून २३ बाटल्या देशी मद्य, डुबेवाडी येथील आरोपी अंकुश नरबत्या गुडदावत याच्याकडून हातभट्टी दारू निर्मितीसाठी वापरण्यात येणारी भट्टी, लोखंडी बॅरल तसेच सुमारे १,००० लिटर कच्चे रसायन तसेच कानगाव येथील आरोपी बाळासाहेब उत्तमराव अडागळे व नितीन एकनाथ फडके यांच्याकडून विविध प्रकारच्या देशी-विदेशी मद्याच्या बाटल्या जप्त करण्यात आल्या.
सदर कारवाई ही पुणे ग्रामीणचे पोलीस अधीक्षक संदीप सिंह गिल्ल, बारामती अपर पोलीस अधीक्षक गणेश बिरादार, दौंड उपविभागीय पोलीस अधिकारी बापूराव दडस यांच्या मार्गदर्शनाखाली यवत पोलीस स्टेशन हद्दीत पोलिस निरीक्षक संतोष तासगावकर यांच्या नेतृत्वात अवैध दारू व्यवसायाविरोधात विशेष मोहीम राबविण्यात आली.
यवत पोलीस स्टेशन हद्दीत अवैध दारू व्यवसाय, हातभट्टी दारू निर्मिती व विक्री करणार् यांविरुद्ध यापुढेही कठोर, सातत्यपूर्ण आणि प्रभावी कारवाई सुरू राहणार आहे. नागरिकांनी आपल्या परिसरात सुरू असलेल्या अशा कोणत्याही अवैध व्यवसायाची माहिती तात्काळ यवत पोलीस स्टेशनला देऊन पोलीस प्रशासनास सहकार्य करावे, असे आवाहन यवत पोलीस स्टेशन यांच्या वतीने करण्यात येत आहे.
